Recientemente Algemene Rekenkamer Aruba (ARA) a publica e rapport ‘Publiek Private Samenwerking’. ARA a haci investigacion riba maneho di e contracto y suministro di informacion di Green Corridor y Watty Vos Blvd.

Banda cu e investigacion ta conclui cu e riesgonan financiero di e proyectonan PPP menciona no ta suficientemente cubri ainda mirando cu desde un comienso di e proyectonan no tabatin claridad riba cobertura di e gastonan a largo plaso, tambe ta keda conclui cu e suministro di informacion na Parlamento pa loke ta trata e proyectonan PPP menciona ta insuficiente. Segun ARA e suministro di informacion na Parlamento den e rapportnan no ta suficiente concentra riba e informacion cu Parlamento mester pa por haci su trabou debidamente. Como ehempel ARA ta menciona cu tin hopi informacion detaya y tiki informacion riba riesgonan financiero a largo plaso y e medidanan pa limita e riesgonan aki. Parlamento no ta haya un bista completo di e gastonan y tampoco ta haya informacion presupuestario y di financiamento riba termino largo. Conclusionnan cu sigur ta pone un tarea specifico riba Parlamento pa percura pa bin cambio y mehoracion den e suministro di informacion, segun Tromp-Lee. Ta trata di proyectonan miyonario cu ta of ta bay bira un peso grandi riba lomba di pueblo y cu ta rekeri un trabou debido di control no solamente door di Gobierno pero tambe door di Parlamento. Ta trata den e caso specifico di e dos proyectonan aki minimo 692.6 miyon florin cu pueblo mester bay paga.

Parlamentario Tromp-Lee ta enfatisa e echo cu Parlamento mester sigura su mes cu e ta haya suficiente informacion di e riesgonan, consecuencia presupuestario y financiero como tambe con ta cubri esaki cu entrada, prome cu aproba un ley pa un PPP. Segun Tromp-Lee mirando e suma cuantioso di ambos proyecto, sigur ta un lastima cu Parlamento no por a ehecuta su poder di autorisacion y su tarea di control debidamente. Tromp-Lee ta enfatisa cu esaki ta algo cu no por pasa nunca mas! Pa e motibo aki mes Tromp-Lee ta bay manda e peticion na Gobierno, uzando e recomendacion di ARA, pa awor en adelante nan percura pa traha rapportnan integral pa Parlamento den cual no ta raporta solamente riba e progreso, pero tambe riba e maneho, gastonan, cobertura financiero y e riesgonan financiero a corto plaso y riba termino largo. Alabes manera recomenda pa ARA ta hopi importante pa e rapportnan ta contene e medidanan pa limita y mitiga riesgo y alabes nan mester duna un bista pa futuro.

Tromp-Lee ta indica cu loke a bay robes nos no por drecha mas, pero si tin den nos man pa percura pa preveni cu e mesun foutnan di Gabinete Mike Eman I y II ta keda cometi den futuro y cu consecuencianan drastico pa nos pais y pueblo pa hopi aña. P’esey mes ta hopi importante pa Parlamento conhuntamente cu Gobierno cuminsa traha riba e recomendacion di ARA pa hancra den ley cu Parlamento mester keda informa debidamente tocante e obligacionnan cu ta mara Pais Aruba pa mas cu un aña, como tambe di e consecuencia presupuestario. Pa cu esaki mester adapta/complementa e Ley di Comptabilidad. Un trabou cu mester keda realisa mas pronto posibel.

LEAVE A REPLY

Please enter your comment!
Please enter your name here