Recientemente parlamentario di fraccion MEP y ex-minister di Husticia y Asuntonan Social, Rocco Tjon a entrega na minister di Economia, Finanzas y Sector Primario, Geoffrey Wever, un documento, riba peticion di e minister mes, cu ta consisti di mas di 150 pagina den cual diferente instancia ta expresa cu e recorte cu e gobierno actual kier haci den goederen en diensten lo tin consecuencia pa comunidad.

Durante e debate di presupuesto nacional 2025 dia 28 di maart 2025 minister Wever a pidi parlamentario Tjon pa entrega documentonan cu ta contene informacion tocante peticionnan di subsidio adicional di varios fundacion cu ta activo riba tereno social. Esaki e parlamentario a entrega diahuebs 15 di mei.

Den su carta, cual el a entrega hunto cu e documentacion pidi pa e mandatario, parlamentario Tjon ta splica cu durante e debate di presupuesto nacional a entrega un mocion, cual ta esencial den pa loke ta trata e splicacion y informacion pidi, cu ta delinea henter e antecedente di e peticion, of e decision cu a ser tuma caba, pa provee e fundacionnan cu recursonan adicional.

El a sigui splica cu den e simannan cu a sigui despues di e debate di presupuesto, fraccion MEP a hiba varios discusion cu e fundacionnan concerni y a base di e discusionnan aki el a remarca cu e necesidad pa recursonan adicional ta grandi y e necesidadnan ey nan ta percibi nan como urgente.

E fundacionnan cu e ta referi na dje den e documento entrege y cu ta den necesidad pa recurso adicional ta Fundacion Respetami, FADA, Stichting Hunto y Famia Planea.

Segun e parlamentario e fundacionnan aki ta conta cu sosten di gobierno pa por brinda nan servicio na comunidad di un forma completamente gratis y/of na un costo hopi abao.

Desde cu e recorte di 10% den goederen en diensten a ser anuncia, e tempo ey ainda minister Tjon, a expresa su preocupacion y a indica cu otro instancia y/of departamento, manera Departamento di Asuntonan Social, tambe a expresa nan preocupacion pa e recorte aki y con esaki lo afecta nan departamento.

Anteriormente como formador durante e proceso di formacion di gobierno minister Gerlien Croes, reaccionando riba e declaracion di Tjon, a subraya cu e recorte cu nan a presenta den e amienda tabata un recorte general, y no dirigi na un solo departamento.

El a indica cu pa cuminsa esaki ta inclui kita tur e contractantnan cu ta nombra na e momento aki y no ta trahando, “Esey ta loke pueblo kier. Pueblo kier wak cu nos na e momento aki ta haci un entrada debido y nos ta tambe responsabel cu e maneho financiero di e pais aki. E recorte di goederen en diensten ta entre otro kita tambe por ehempel autonan di 150 mil cu un minister ta coriendo. No ta specificamente riba un departamento. E ta general cu nos ta corta 10% riba tur e gastonan cu tin innecesario den e gabinete e ultimo siete aña,” el a señala e momento ey.

Di su banda prome minister Eman, e momento ey como co-formador, a subraya cu den e lista di prioridad di gobierno di AVP y Futuro e ultimo hendenan cu nan lo corta riba dje ta esnan den necesidad, mas bien ta bay yuda.

“No ta bay kita nada di e hendenan cu tin necesidad na Aruba. E gobierno ey ta bayendo, e gobierno cu tabata haci esey ta bayendo. Awor nos ta bay tin un gobierno cu ta bay mira e necesidadnan aki. Pero ta awor aparentemente a cuminsa ripara cu tin hendenan den necesidad pa purba pone como si fuera cu e gobierno di AVP cu Futuro lo bay mishi cu esey. Esey no ta e caso. Nos lo dirigi tur e reduccion caminda nos ta sinti cu tin gastonan innecesario,” el a enfatisa e momento ey.

Manera ta conoci dia 7 di maart, den e prome reunion cu a ser realisa pa tratamento di presupuesto nacional 2025 lider di fraccion AVP e momento ey, awor prome minister Mike Eman, a presenta un amienda extenso y detaya, den nomber di fraccionnan AVP y Futuro, cu a cambia e direccion di e presupuesto.

E cambionan mas grandi den e amienda tabata entre otro implementacion di reduccion di accijns di 10 cen riba gasolin, aumento di reparatietoeslag cu 250 florin pa pensionado y aumento di financiamento pa Fundacion Pa Nos Comunidad.

Otro cambio grandi ta e recorte di 10% den goederen en diensten cual e fraccionnan a presenta pa yuda financia e cambio di direccion. Eman a splica e momento ey cu pa aña Raad van Advies tabata bisa cu nan ta mira tur aña e post di goederen en diensten ta 190 miyon florin y ta keda crece, pero pueblo no ta mira nada. Pa motibo aki e gobierno nobo a tuma e decision pa reduci esaki cu 10% cual, segun el a indica, ta trece otro espacio financiero.

“Na momento cu bo ta traha riba momentonan di inversion pa nos comunidad, den poder di compra, of inversionnan duro pa produci un miho producto pa Aruba, mester mustra tambe cu bo ta haci ehercicio pa por capitalisa pa esaki. Y esaki ta sigur locual nos ta bay logra cu e reduccion di goederen en diensten,” Eman a sigura.

Segun el a indica e momento e cifra cu e gabinete nobo lo logra yega na dje ta 21 miyon florin di reduccion. Den esey lo tin reduccion tambe di gasto di personal di e bureau di ministernan ya cu nan lo reduci e cantidad di trahado pa minister.