Ayera parlamentario lider di fraccion MEP, y ex prome minister, Evelyn Wever-Croes a manda por escrito diferente pregunta pa minister di Turismo, Transporte y Labor, Wendrick Cicilia relaciona cu anuncio di eliminacion di arbeidsmarkettoets.
Den su carta, cu ta contene 11 pregunta dirigi na e mandatario di Turismo, Transporte y Labor, parlamentario Wever-Croes ta indica cu el a tuma di un anuncio recien di Camara di Comercio (KvK) cu ta indica cu ta elimina e arbeidsmarkttoets y tambe un comunicado di un parlamentario.
Wever-Croes ta splica cu despues di a haci un investigacion el a conclui for di un solo medio di comunicacion cu e anuncio cu e ta referi na dje ta basa riba un instruccion di maneho di minister di Husticia, Integracion y Transporte Publico Arthur Dowers.
El a splica cu minister Dowers a instrui cu entrante di 24 di april 2025, e exigencia cu tabatin pa tur persona cu haci solicitud di un permiso di estadia cu e meta pa subi e mercado laboral, di pasa prome un toets via Departamento di Progreso Laboral (DPL), e asina yama ‘arbeidsmarkttoets’, no ta vigente mas.
E cambio di maneho aki, parlamentario Wever-Croes a señala, ta nifica cu tur peticion lo ser entrega directamente na DIMAS. El a menciona cu segun minister Dowers a indica e cambio di maneho aki ta basa pa adresa e necesidad cu tin pa empleado den e mercado local y pa agilisa e proceso di peticion.
Como cu DPL ta resorta bao di minister Cicilia, Wever-Croes a manda algun pregunta pa e mandatario relaciona cu e topico aki.
E parlamentario ta puntra minister Cicilia si e tabata na altura di e instruccion di maneho emiti pa minister Dowers prome cu el a drenta na vigor, y si e por informa dicon no a anuncia esaki por medio di un comunicado di prensa of conferencia di prensa.
Parlamentario Wever-Croes tambe ta pidi e minister por informa si nan a envolvi of a consulta cu DPL den e proceso di tuma e decision aki; si e departamentonan DPL, DAO y DWJZ a duna nan conseho na gobierno prome cu nan a tuma e decision pa elimina e ‘arbeidsmarkettoets’; si e por comparti e consehonan aki cu Parlamento di Aruba; y si e por comparti tambe e maneho nobo di gobierno cu parlamento.
E parlamentario a puntra minister Cicilia kico ta su posicion, como Minister di Labor, riba e cambio di maneho aki; y con e ta mira e impacto di esey riba e rol y funcionamento di DPL.
Wever-Croes a pidi e mandatario pa informa parlamento kico ta e consecuencia cu e decision aki por tin pa proteha trabao y vacatura pa e mercado local laboral; y alabes a puntra si e ta considera cu e decision aki como un interferencia den su ministerio.
Por ultimo el a pidi e minister pa informa si e ta di opinion cu, den cuadro di transparencia, nan mester a informa parlamento prome cu a anuncia e cambio di maneho aki.
Den un instruccion di politica di minister di Husticia, Integracion y Transporte Publico, Arthur Dowers fecha 24 di april 2025, cu el a manda pa director di DIMAS Sr. Ruiz-Paskel, e ta indica cu despues di consulta cu e minister di Labor, ta implementa e suspension temporal di e ‘arbeidsmarkttoets’ realisa pa Departamento di Progreso Laboral.
E instruccion di politica ta indica lo siguiente:
“Teniendo cuenta cu loke ta stipula den articulo 7, paragraf 6 di e Ordenansa Nacional di admision y salida (LTU) di Aruba, ta dicidi cu, cu vigencia for di awor y te cu otro aviso:
- Pa solicitantenan di permiso di estadia cu meta pa traha na Aruba, no ta necesario pa haya un arbeidsmarkttoets pa medio di Departamento di Progreso Laboral (DPL).
- E solicitudnan di permiso di estadia cu e meta aki mester ser entrega directamente na Departamento di Integracion, Maneho y Admision di Stranhero (DIMAS).”
Minister Dowers ta indica cu e decision pa suspende temporalmente e ‘arbeidsmarkttoets’ ta busca pa, den e circunstancianan actual, yuda pa un proceso mas eficiente y rapido di tramitacion di e solicitudnan y pa responde na e necesidadnan urgente di mercado laboral.
