Relaciona cu e veredicto di corte den e caso cu candidato pa minister, Mike de Meza, a entama contra Departamento di Impuesto (DIMP), ex prome minister y actual parlamentario lider di fraccion MEP Evelyn Wever-Croes a duna su reaccion y alabes a duna un splicacion tocante kico e ley di screening pa minister ta indica den contexto di e caso.

“Hues a manda e bala back na scochi di Mike Eman,” e ex prome minister a enfatisa referiendo na loke hues a bisa den su sentencia den e caso cu DIMP a gana. Wever-Croes a splica cu den su sentencia hues ta bisa cu prome minister Eman y minister Gerlien Croes como formador ya caba na maart a haya tur documento for di DIMP relaciona cu e screening di De Meza como candidato pa minister.

Pero esaki no tabata uno faborabel pa De Meza door di cual nan a pidi DIMP pa reconsidera su posicion ora cu De Meza a paga tur loke e tabata debe, pero DIMP a informa tanto prome minister Eman como minister Croes como formador e tempo ey ainda cu e no ta cambia su posicion.

Parlamentario Wever-Croes ta menciona cu den su sentencia hues a bisa cu di e tempo ey, e formador por a tuma decision caba y a remarca cu e formador no mester a laga e situacion keda tarda asina tanto y tene henter un gobierno secuestra.

E ex prome minister tambe a referi na loke e sentencia ta bisa cu tin dos cos cu ta traha den contra di De Meza; uno ta cu repetidamente den pasado e no a entrega su formularionan di belasting; y e otro ta cu repetidamente no a paga su belasting na tempo.

E punto cu si ta na su fabor ta cu aworaki, ora cu e kier bira minister, el a core paga y entrega tur cos, y awor oficialmente e no debe nada.

Sinembargo, Wever-Croes a remarca cu si wak kico e ley di screening ta bisa, e no ta bisa pa wak solamente kico ta e situacion aworaki, pero e ta bisa tambe cu mester mira e comportamento di e persona den e añanan anterior.

El a splica cu basa riba esaki, si bay back na e ley di screening, articulo dos di e ley ta exigi un investigacion fiscal, articulo cinco ta bisa kico e investigacion fiscal mester bisa, y e ta bisa den inciso uno kico e inspecteur mester haci, den inciso tres kico e ontvanger mester haci, cual ta cu nan no mester wak solamente si e persona debe, pero nan mester wak su comportamento den ultimo cinco aña of si tin otro cosnan tambe cu por refleha riba su integridad y nan tin cu raporta riba esey.

Parlamentario Wever-Croes a sigui splica cu el a compronde di e caso den corte cu e declaracion ey a sali negativo pa De Meza y hues a bisa cu e no ta bay cambia esaki y e ta keda negativo.

El a subraya cu articulo ocho di e ley di integridad ta bisa cu si articulo cinco su investigacion a sali negativo, no por propone e persona como candidato pa minister.

E ex prome minister tambe a reacciona riba e declaracion cu e prome minister actual, Mike Eman, a duna relaciona cu e veredicto aki y a indica cu ta parece cu e mandatario a lesa otro veredicto cu esun cu hues a duna y a bisa cu e tabata manipula demasiado pa no carga responsabilidad.

“Mi kier sa el a lesa otro veredicto pasobra e kiermen cu Sr. De Meza a gana e caso. Mi ta haya cu e tabata manipula demasiado. Atrobe bo ta weita cu e no kier carga responsabilidad. E ta pone mi corda e Mike Eman cu a percura pa Aruba haya e KB, curatela financiero na 2014. Manipula, conta storia bunita, biba den un fantasia sin asumi responsabilidad. Awe mi a weita e mesun Mike Eman eynan cu lamentablemente ta duna un declaracion asina,” Wever-Croes a remarca.

Segun e actual parlamentario lider di fraccion MEP, prome minister Eman a “downplay” e veredicto di hues cual, den su opinion, no ta bon pa e haci y ta spera cu e conseheronan di e mandatario yud’e pa e tuma un decision pa caba riba e tema aki.

“Aruba no por keda mas tempo sin un gobierno. Gobierno no ta biniendo parlamento pa debatenan, gobierno no ta duna parlamento informacion, gobierno no ta contesta niun pregunta di parlamento. E gobierno aki no ta gobernando, nan ta incompleto y Aruba tin mester di un gobierno cu ta goberna,” el a agrega.

El a enfatisa cu su fraccion lo keda vigilante y ta spera cu demas parlamentarionan tambe ta vigilante y critico pasobra nan ta hopi keto. El a indica cu algun parlamentario, specialmente esnan di coalicion, AVP y FUTURO, ta hopi keto, no ta dunando nan opinion riba esaki y como parlamento ta importante pa mustra cu nan ta e organo mas halto di e pais ki y ta exigi cu ley ta ser cumpli.

“E expresionnan di Sr. Eman awe ta un falta di respet pa corte, e ta un manipulacion y ta mustra atrobe cu nos ta bayendo den e mesun direccion cu a hiba nos e tempo ya na e curatela financiero y e kiebro di confiansa den Reino,” el a finalisa.

Manera ya caba ta conoci prome minister Eman den su declaracion a indica cu pa su persona, como formador y prome minister, ta cla kico ta e siguiente pasonan cu e mester tuma. Mirando cu awor tin un veredicto di corte y cu e dossier di De Meza ta completo, el a indica cu awor ta keda nada mas cu sinta cu De Meza pa pasa over di su dossier y di eynan lo continua cu e proceso, sin specifica si lo nombra De Meza como minister of no.

Prome minister Eman tambe a ratifica cu el a scoge pa laga e proceso cana e caminda cu el a cana, yega te corte, no pasobra e tabatin duda den De Meza, pero mas bien pa laga e proceso cana e caminda cu ley ta prescribi.

“Mi no mester a pidi ningun papel tampoco pa mi tin confiansa den Sr. De Meza. Tur documentacion cu a pidi di tur instancia ta pasobra ley ta prescribi esey, pero apart di loke ley ta prescribi, documentacion cu bo mester, bo conoce un hende pa mas di 20 aña, kiermen mi no tabatin mester di documentacion di ningun instancia pa mi sa kico mi tin na Sr. De Meza cu kier dedica y sirbi e pais aki,” el a enfatisa.