Recientemente parlamentario lider di fraccion MEP y ex prome minister Evelyn Wever-Croes a reacciona riba declaracion di parlamentario lider di PPA, Otmar Oduber tocante e falta di calridad riba e suma di recorte den AZV.
Den un video papiando cu prensa cu parlamentario Wever-Croes a comparti riba su pagina di Facebook el a indica cu e ta preparando pa suministra e documentonan tocante e recorte den AZV na parlamentario Oduber ya cu den aña 2020 Oduber no tabata activo den politica.
Tocante con a yega na e recorte y e suma di 60 miyon Wever-Croes a splica cu na mei di aña 2020 ora cu Aruba tabata ya pasando den e pio momentonan di e pandemia Hulanda a presta Aruba placa pa sobrvivi y pa entre otro paga pa FASE pa esnan cu a perde trabou, pa paga pa loonsubsidie pa esnan cu tabata na trabou por a keda na trbaou.
El a sigui splica cu dia 15 di mei, ya ta cinco aña despues, Hulanda a indica cu nan ta dispuesto pa fia placa, pero a bin cu un condicion acerca y e condicion ey tabata cu gobierno mester a corta cinco miyon pa luna den gastonan di salud, cu ta bira 60 miyon pa aña, cual el a enfatisa gobierno a bisa nan no por a cumpli, pero di otro banda no tabatin entrada tampoco pa cubri e gastonan pa sobrevivi pandemia.
“Cierto momento nos di nos ta obliga, lomba contra muraya, cuchiu na nos garganta nos mester a acepta e condicion aki pa nos a haya prestamo di 300 miyon, despues 600 miyon mas ta bira 900 miyon, pero mesora nos a manda nos cartanan di protesta y tur e cartanan mi ta bay suminstra na colega Otmar Oduber pa e mira,” e parlamentario a indica.
El a splica cu nan a exigi di Hulanda un splicacion di unda nan a saca e suma di 60 miyon, of e cinco miyon pa luna.
Parlamentario Wever-Croes a indica cu miembro representante di Aruba den CAft e tempo ey, Hellen van der Wal, a bisa cu CAft semper a papia di cinco miyon pa aña, no cinco miyon pa luna, pero den e decision di Conseho di Minister di Reino na Hulanda diripiente a cambia esaki pa cinco miyon pa luna cu a bira 60 miyon pa aña.
“E decision ey nos a protesta energicamente e tempo ey, despues y te ultimo ainda nos a protesta esey, pero Hulanda no tabata kier a tende, nan a keda para riba e 60 miyon y nos a haya nos obliga di ta ehecuta e 60 miyon akinan den cuido y un di nan tabata e lista di remedi cu AZV a saca un 200 y algo remedi di su lista,” el a agrega.
Segun Wever-Croes e momento ey nan a cuminsa traha pa crea un surplus den AZV y asina crea espacio financiero pa por duna tur hende nan remedinan back.
El a splica cu na momento cu AZV a informa su gobienro, den december 2024 despues di eleccion, tocante e100 miyon florin cu tin di surplus, Gabinete Wever-Croes II a tuma e decision den Conseho di Minister pa duna tur hende nan remedi nan back.
El a remarca uc e dicison pa duna tur e remedinan cu a ser kita for di e lista di remedi back tabata un decision cu su gobierno a tuma den december, pero aworaki, segun el a indica, Gabinete AVP-FUTURO a cambia e decision na caminda y a dicidi cu solamente mita di e remedinan cu a ser kita ta ser duna back. “Mi ta kere cu si tin 100 miyon surplus bo por duna tur e remedinan back tambe,” el a subraya.
Pro ultimo el a indica cu miembro e tempo ey di CAft, Hellen van del Wal, mes a keda sorprendi cu e deicison di Hulanda y den su discurso di despedida prome cu el a baha como miembro di CAft el a papia di esey tambe y a usa e situacion como ehempel con Hulanda a mal usa un situacion na momento cu Aruba tabata den situacion dificil y a exigi algo asina “inhumano”.
“E tabata e decision mas inhumano cu Hulanda a impone riba nos pero na e momento ey nos mester a dicidi si nos ta bay lucha pa logrele y toch purba scapa bida di hende cu nos mester a haci cu e pandemia. Cual nos a haci, pero mesora nos a cuminsa traha riba un solucion. Esey ta e situacion di e tema di AZV,” el a finalisa.
Durante su conferencia di prensa, lider di fraccion PPA Otmar Oduber a expresa su preocupacion tocante e falta di claridad den e suma recorta na AZV y a condena e accion, unda a forsa AZV a pa corta 60 miyon florin riba entre otro remedi y servicio medico, y remarca cu awor niun hende kier responsabilisa pa e hecho ey.
“Nos di fraccion di PPA ta alerta nos comunidad, cu nos no ta bay laga esaki drumi y ta bay haci trabou di dje, cuestionando AZV, Gobierno anterior como Gobierno actual y sigur CAFT y BZK, tocante e suma aki y e origen di e accion iresponsabel aki”, Oduber a enfatisa.
Oduber a señala tambe cu actualmente tin un acusacion di e gobierno actual contra e minister di salud anterior, di a corta iresponsabel den AZV. Sinembargo e minister di salud anterior ya a indica cu e no a corta iresponsabel, pero a sigui instruccion di Hulanda, esta tanto for di Secretario di Estado Knops como despues di Secretario di Estado van Huffelen. Pa parlamentario Oduber no tin claridad riba kico e suma exacto ta.
Alabes el a menciona cu miembro di CAft e tempo ey, Hellen van der Wal, a indica cu e no sa tocante e instruccion cu mester corta cinco miyon pa luna, ya cu segun e ta corda, tabata papia di miyon pa aña, mientras cu di otro banda sr. Gradus ta contradeci esaki.
“Sea ta BZK, CFT, AZV, e minister anterior of actual mester para responsabel y bin cu claridad tocante e suma di recorte aki den AZV, di cual hopi hende no a cuestiona y pueblo merece di haya un contesta cla y responsabel tocante e recorte forsa aki, cu tabata a costo di remedi, salud y mi ta spera no bida di nos hendenan, cu finalmente den un periodo di 3-4 aña ta rond di 120 miyon florin,” Oduber a finalisa.
