Ayera riba su pagina di Facebook, parlamentario Xiomara Maduro (MEP) a comparti un mensahe tocante dia 11 di augustus 1977, cu tabata un dia decisivo den e lucha di Aruba pa logra su Status Aparte den Reino Hulandes.
“Awe 48 aña pasa, dia 11 di augustus 1977, tabata un dia decisivo den e lucha pa por a yega na Aruba su Status Aparte den Reino Hulandes,” parlamentario Maduro a skirbi. “E luna di augustus tabata tipifica pa hopi accion, tension, welga general y violencia, na unda hasta sanger a wordo drama.”
Maduro a recorda cu “homber y muhenan balente a lanta para y lucha pa locual nan a mira como e caminda pa por progresa como Pais. Tabata dianan scur den historia di nos Pais cu tabata antesala pa e bon cu tabata na caminda.”
Reflexionando tocante e logro y e impacto duradero pa nos isla, Maduro a bisa cu “e Status Aparte di berdad a yuda nos desaroya Aruba su economia, pero el a mustra nos cu tempo tambe cu no ta tur hende por deal cu autonomia of sa su balor.”
“P’esey awe ta un bon dia pa nos reflexiona riba kico e historia di nos Pais ta conta nos riba e lucha hiba y kico autonomia ta significa pa cada un di nos. Autonomia ta mas cu un palabra. Ta keda na nos ki balor nos ta dun’e y con nos ta duna contenido na dje,” el a conclui.
Augustus scur
Augustus scur ta referi na e welga general na Aruba na 1977, un welga general di un siman largo organisa pa politico y activista Betico Croes, cu meta pa logra mas autonomia y independencia pa Aruba for di Antias Hulandes, cu tabata domina en gran parti pa Corsou y tabata opone e salida di Aruba.
E welga a dura di dia 11 te dia 18 di augustus 1977.
E welga aki ta considera un momento clave den e lucha di Aruba pa autonomia y separacion for di Antias Hulandes, cu na final a resulta den Status Aparte di Aruba na 1986.
