Durante debate publico pa trata e Segundo Cambio di Presupuesto 2025, Parlamentario Xiomara Maduro a haci algun pregunta na Minister Geoffrey Wever di Finanzas riba su maneho pa trata cu inversion publico.
Den aña 2025 tin 79 miyon florin aloca pa inversion, di cual solamente a usa 15 miyon florin. E resto di placa cu no por bay na inversion na bienestar di Pueblo, lo mester bay pa paga debe, pero Minster Geoffrey Wever a recuri na un triki pa “wanta e placa” aki. Parlamento mester “watch out” pa e “Geoffreynomics” aki cu placa di inversion publico.
Inversion
E parlamentario ta splica cu pa aña 2025 Gobierno a presupuesta 71 miyon florin y te cu tercer kwartaal a gasta solamente 15 miyon florin. Esaki debi na e falta di capacidad pa por “commit” e placa pa inversion cu ta cla pa por wordo ehecuta, un problema conoci pa hopi aña caba. Asina mes Minister Wever a aloca 8 miyon florin extra pa inversion, y aunke cu Raad van Advies a cuestiona esaki, toch e minister a persisti y a pone esaki tambe pa inversion, dus en total tin 79 miyon florin pa inversion den aña 2025.
Fondo di inversion no ta cla
Segun Minister Wever, e kier hinca e placa aki den un fondo special di inversion, pero e Ley pa traha e potchi special aki pa inversion no ta cla. Consecuencia di esaki ta cu e 64 miyon florin di e 79 miyon florin cu no a wordo uza pa inversion na bienestar di Pueblo lo mester bay pa paga debe. Esaki conforme e pensamento di e supervision financiero di CAFT cu kier mira e placa di inversion cu no ta wordo uza, bay pa paga debe di Aruba mas lihe. Minister Wever no ta mucho contento cu e pensamento aki di CAFT y pesey e mandatario a recuri na e triki di purba “wanta e placa” pa e no bay “perdi” na paga debe.
Dotatie
Den su contesta na Raad van Advies, Minister Wever a splica cu si e no ta logra introduci e fondo di inversion den aña 2025, e lo bay “wanta e placa” aki via “dotatie aan de balans” di Pais Aruba pa e por haya us’e ora e fondo di inversion keda cla den aña 2026. Mester bisa cu e triki di “wanta e placa” aki no ta algo normal den Aruba su Finanzas publico y e no ta gana e “financieel schoonheidsprijs.” Locual nos ta mira aki ta nada mas cu e mesun “trikinomics” cu AVP gusta uza den gobernacion cu ta resulta despues den daño na e cartera di Pueblo. Pa e motibo aki Parlamento mester bay “watch out” pa e “Geoffreynomics” cu placa di inversion pa e trikinan aki no bay perhudica Pueblo di Aruba
