Parlamentario Xiomara Maduro ta pidi claridad tocante destino di surplus di fondonan social SVB y AZV

E fondonan social di Aruba, SVB y AZV, tin pa algun aña caba un resultado financiero hopi positivo cu a resulta den surplusnan structural. Tabata e vision di MEP pa e extra fondonan aki a keda na SVB y AZV cu bista riba e sostenibilidad di e fondonan aki pa futuro.

E supervisor financiero CAFT tin e pensamento cu e extra fondonan aki mester bay pa Gobierno pa asina por baha e debe di Aruba mas lihe. Sinembargo, den e opinion di e Gobierno di MEP e fondonan extra mester keda na SVB y AZV pa asina por evita cu mester bay hisa e edad di pensioen of corta den e pakete di cobertura di AZV den e tempo nos dilanti.

E Gobierno di AVP y FUTURO tin un otro pensamento y esaki lo por tin efecto riba e surplusnan di e fondonan social aki. Ta trata di e anuncio di Minister Eman cu lo hisa e pensioen di AOV, y tambe cu lo baha e prima di AZV pa nos grandinan. Tur dos decision por tin un efecto financiero grandi y ta pone cu e surplusnan di e fondonan social lo ser afecta. Banda di esaki Minister Wever a splica Raad van Advies cu Gobierno lo kier haci uso di e surplusnan di e fondonan social aki pa por baha e debe di Pais Aruba manera CAFT ta sugeri. Esaki tambe ta un decision cu ta afecta e finanzas di SVB y AZV. Pa e motibo aki Parlamentario Xiomara Maduro a haci pregunta na Minister Wever di Finanzas pa asina por haya mas claridad riba e destino di e surplusnan di e fondonan social SVB y AZV.

Segun Minister Wever den aña 2025 ainda no lo bay haci uso di e surplus di e fondonan social pa por yuda pa baha debe di Aruba via “schatkistbankieren.” Pa locual ta e decision di Eman pa hisa pensioen di SVB y kita e prima di AZV pa e pensionado, esey si Minister Wever no a splica con esaki lo ser financia. E mandatario a referi na Minister Eman pa haya splicacion, locual ta basta inusual, ya cu ta Minister di Finanzas mester por splica esaki. Di tur manera e ta keda importante pa Pueblo haya sa con e decisionnan di Eman lo afecta e desaroyo di e fondonan social, pasobra mester por sigura cu no mester bay hisa edad di pensioen of corta den e pakete di cobertura di AZV den e tempo nos dilanti.