Recientemente riba rednan social como den medionan di comunicacion local a circula informacion di posibel situacion na unda ex-prome minister y actual parlamentario di MEP, Evelyn Wever-Croes lo a duna permiso na un medio di comunicacion cu e meta pa beneficia partido MEP y Gabinete Wever-Croes e momento ey. Reaccionando riba e informacion y acusacionnan, Wever-Croes a rechasa rotundamente cualkier informacion di e naturalesa ey.

Riba su pagina oficial di Facebook e ex-prome minister a reacciona riba e acusacionnan aki indicando cu ta trata di acusacionnan falso cu e portal local 24ora a haci contra di su persona.

“Despues di un bunita Dia di Mama, toch mi tin cu reacciona di biaha riba acusacionnan falso atrobe contra mi di e gobierno nobo y su voceronan, cu ta purbando di daña mi nomber gañando yen di cos riba mi. E acusacion mas recien ta cu ami lo a duna un permiso pa radio na Sr. Giel di Mas Noticia. Esaki ta FALSO pa diferente motibo,” e actual parlamentario a indica den su publicacion.

El a splica cu e acusacionnan ta falso pa motibo cu nan ta referi na un carta cu no tin stempel di su oficina; e no tabata minister di telecomunicacion nunca y segun e constitucion ta e minister di telecomunicacion so por duna e permiso ey; y por ultimo, el a sigura cu no tin ningun prueba tampoco cu el firma riba dje.

Wever-Croes a señala tambe cu cada biaha cu nan lansa un mentira asina contra su persona, ta pasobra nan ta purba di tapa algo. El a menciona cu den pasado AVP a hasta inventa e nomber “friends and family” pa tapa tur loke nan tabata regala nan sponsor y amigonan.

“Ta kico lo ta cu nan kier tapa awor? Talbes nan mes ta regalando permiso pa radio na nan amigonan? Time will tell… Pa awor, mi kier a djis reacciona y coregi e mentira aki,” el a remarca.

E carta cu e ex prome minister ta referi na dje ta un carta cu a bira publico, y cu su autenticidad no a keda verifica, den cual e periodista Norben Giel, director di Upload Media Aruba y Masnoticia.com, supuestamente lo mester a acerca Wever-Croes den su calidad di prome minister e tempo ey pa propone e apertura di un radio emisora pa yuda MEP y Gabinete Wever-Croes.

Den e carta Giel ta splica cu el a nace den mundo di radio na 2005 na Top fm y na 2011 a lansa masnoticia.com y pues ta conoci ki partido e ta apoya, pa cual e lo mester a termina e relacion cu su socio pa e por sigui apoya MEP y Gabinete Wever-Croes abiertamente.

Segun e periodtsa a menciona den e carta aki, el a indica cu e tabatin full un plan pa loke ta emisora na Aruba cu programacion variabel cu un emisora noticioso cu boletin extra di loke pasa riba caya etc y trece informacionnan pa comunidad. Alabes e plan ta pa inclui un programacion di noticia pa defende e gobierno di e tempo ey, MEP, ora cu oposicion tabata kier a ataca gobierno.

“Mi kier wak e oportunidad cu Sra. Prome Minister por averigua kico tin posibilidad cu por habri e 95.7 mi ta interesa den dje, si kier aprob’e lo ta bon pero nos no haci esaki pura pa bin un papiamento rond mi ta [dispuesto] pa bay den aire december 2018 pa Januari. ora mi caba di busca ekipo y un bon team pa activa e emisora den aire. Te ainda ta mustra cu noticia lo bay ta mi persona merdia y ta bezig ta sondia otro hende cu por confia pa apoya gobierno pa den futuro pasobra ami lo bay tin programa di mi mes na radio tambe,” Giel ta indica den e carta.

Segun e carta aki e idea tabata pa hendenan di MEP so papia na e radio emisora aki, y cu niun persona di AVP lo aparece papiando den aire na e radio emisora aki. Den e carta tabata extende invitacion tambe e ex mandatario pa un biaha pa siman papia den u programa pa informa comunidad tocante desaroyonan di gobierno y Aruba y pa kibra e “Fake News’ cu lo por tin rond.

E periodista a pidi Wever-Croes pa apunta un persona di su confiansa y cu tabata apoya e gobierno di e tempo ey pa tambe haci peticion pa dunele otro frecuencia pa asina tin mas cu un radio cu ta apoya partido MEP abiertamente.

Ademas el a menciona cu e tin un plan pa television pa bay live cu tabata plania pa december 2018 of comienso di aña pero a traves di television online debi cu planta di television mes ta bastante placa y e fee pa luna na DTZ ta demasiado pa e por paga.

Por ultimo, Giel a termina e carta indicando cu e no mester placa y no kier bira coordinador ni nada di esey, e idea ta pa e gana e placa via e radio emisora cu propagandanan cu clientenan y ofrece promocion y apoya MEP abiertamente.