(NLTimes) – Parlamentario di D66 Hanneke van der Werf kier prohibi smartphone for di henter e scol, na luga di e prohibicion actual cu ta conta pa klas so. Un mayoria den parlamento ta sostene scolnan liber di telefon, segun RTL Nieuws a reporta.
Smartphone a keda prohibi den klas na casi tur e 1,600 scol secundario desde comienso di aña pasa. Sinembargo casi mita di e scolnan ta permiti muchanan usa nan telefon entre les y durante pauze.
“Na scolnan unda telefon te ainda ta permiti durante pauze, e les hopi biaha ta cuminsa cu calma e emocion di Snapchat for di pauze. Y e ta hopi desagradable durante pauze ora cu e momentonan aki ta usa pa consumi rednan social,” Van der Werf a bisa e noticiero. “Nos ta mita te ainda cu hopi biaha e studiantenan ta bezig cu TikTok entre lesnan y docentenan mester haci papel di polis.”
Pa e motibo aki e lo entrega un proposicion pa aplica e principio di “na cas of den caha fuerte,” den cual e telefon ta laga na cas of ta cer’e den e caha fuerte di scol pa henter e dia, na tur scol. “E docentenan tambe ta pidiendo esaki,” e parlamentario di D66 a bisa.
Un encuesta haci pa RTL a demostra cu e proposicion lo tin sosten di mayoria, cu GroenLinks-PvdA, NSC, BBB, ChristenUnie, CDA, SP, SGP y PvdD bisando cu nan lo vota na fabor di esaki.
E psicologo di desaroyo Loes Pouwels ta sostene e principio di “na cas of den caha fuerte”, pero no ta pensa cu esaki realmente lo reduci e tempo cu muchanan ta pasa riba nan telefon. “Pa medio di prohibi telefon durante oranan escolar, e chens ta grandi cu hende lo pasa mas tempo riba nan telefon despues di scol,” el a expresa na e noticiero.
