Recientemente a tuma luga den Parlamento di Aruba tratamento di presupuesto pa DOW pa aña 2025. Durante e reunion publico minister encarga pa aworaki cu cartera di Infrastructura, Arthur Dowers, a contesta diferente pregunta di parlamentarionan.

Minister Dowers, ken ta cargando cartera di Infrastructura pa aworaki pa motibo cu ainda no tin claridad den e caso di screening di candidato pa minister Mike de Meza ken lo mester a carga e cartera aki, a splica cu aworaki Gabinete AVP-FUTURO tin un luna den gobierno y tin algun aspecto, manera por ehempel evaluacionnan, cu lo por duna contesta riba dje den e periodo dilanti.

Di parti di fraccion AVP, minister Dowers a ricibi pregunta relacion cu e situacion di colega Mike de Meza. Contestando esaki el a splica cu e situacion ta keda den man di e prome minister Mike Eman y den caso cu tin cualkier cambio den gobernacion, gobierno lo presenta esaki na parlamento y parlamento mes lo tin cu aproba esaki. El a agrega cu na momento cu un otro minister ocupa e posicion, e momento ey e lo pasa e carteranan na e minister concerni.

E mandatario a ricibi algun pregunta tocante por ehempel maneho di asfalt den cierto area y si ta bay reevalua e procesonan aki. El a indica cu tin cierto listanan traha, tin un programa, un periodo stipula pa cierto trabou y cu lo mester reevalua cierto di e aspectonan aki pasobra talbes tin situacionnan cu ciudadanonan ta trece dilanti cu talbes no ta riba e listanan actual.

El a indica cu nan a cuminsa haci limpiesa den algun area y trece ordo back den e luganan aki. Durante e limpiesa aki, el a sigui splica, a mira cu hopi cos a bay for di man pa un tempo bastante largo, y no ta papiando solamente falta di mantencion, pero ta mira cu door di e falta di mantencion diferente caminda personanan a haci como si fuera ta dump publico y doñonan di negoshi ta bandona e area.

El a splica cu nan a cuminsa acerca cierto doño di negoshi, hasta esunnan cu no a bandona y ta puntra cooperacion, aunke e ploegnan a haci limpi, entre e doñonan di negoshi y gobierno y DOW pa asina logra hopi mas avance.

Minister Dowers a ricibi pregunta tambe pa loke ta trata planificacion di asfaltamento den bario. El a splica cu hopi biaha e peticionnan cu ta ser haci, ta ser realisa door di ciudadano y tin un planificacion pa mas cu un aña y esey DOW ta tene cuenta cune, pero nan lo bay reevalua esaki den e periodo dilanti.

Pa loke ta e parti di San Nicolas, specificamente relacion cu un oficina di MFA, el a indica cu esey tin nan atencion. El a splica cu manera ta conoci den pasado e MFA nan a ser traha door di SOGA y aworaki e proceso pa San Nicolas tambe ta den evaluacion y e tin atencion di gobierno. El a remarca cu nan ta kere cu e facilidad aki lo duna un mehoracion di servicio pa loke ta San Nicolas

Contestando pregunta tocante e renobacion di Reina Beatrxi School y Juliana School, el a indica cu esey ta un di e proyectonan cu lo mester bay tuma luga y pa cual tin fondonan den inversion.

El a remarca cu tin un disputa legal na e momento aki cu Juliana School pasobra el a ser duna como opcion na un particular, pero gobierno ta bezig na e momento aki den negociacion cu e persona aki. El a agrega cu tin un veredicto provisional di hues cu ta prohibi gobierno pa por haci algo cu e proyecto aki, provisionalmente, pero na mesun momento a sigura cu nan ta den negociacion y ta spera cu por yega na un claridad riba e esaki.

Contestando e pregunta si tin suficiente capacidad pa por asfalta tur loke mester ser realisa, el a splica cu tin negociacion na e momento aki andando pa mira si por aumenta e capacidad di asfaltamento y den simannan binidero lo duna claridad riba esaki tambe.

For di fraccion MEP minister Dowers a ricibi pregunta si tin posibilidad di asfalta mas caretera cu no ta presupuesta. E mandatario contesta cu esey no ta posibel, y na mesun momento a splica cu loke si ta posibel ta pa mira si tin prioridad otro caminda pasobra aworaki tin un planning, pero talbes den futuro, pos sucede algo cu ta cambia e prioridad y move un caminda na luga di haci loke tin den presupuesto na e momento aki.

Pa loke ta e e pregunta cua ta e scolnan cu ta cay den ounderhouds pa e aña cu ta bin, el a indica cu na e momento aki tin riba e lista Nos Paraiso, Mon Plaisir Mavo, Colegio Sagrado Curason onderbouw, Colegio Sagrado Curason Bovenbouw, Scol Preparatio Tharciucius, St. Paulus School, Ayo Kleuterschool y Scol Preparatorio Prome Paso.

Tocante con leu ta cu e audit y inventarisacion pa cada scol, el a splica cu segun el a compronde aworaki ta cabando cu onderbouw, ta spera cu esey ta cla den algun siman binidero, y despues di esey lo cuminsa cu evaluacion di e scolnan bovenbouw.

Pa loke ta trata e proyecto di ASU, den e tereno situa patras di Sporthall Santa Cruz, minister Dowers a splica cu e ta na altura di esaki door cu el a ser informa den Conseho di Minister. El a sigui splica cu na e momento aki DOW mes no ta altura di esey, pero lo busca mas informacion den e dianan binidero.

El a agrega cu loke si ta e caso ta cu parce cu tin artefactonan di balor arkeologico den e tereno aki y tin un proceso di evaluacion tumando luga eynan relacion cu esaki. El a indica cu den e dianan cu ta sigui lo bin mas claridad riba esaki y esaki lo ser informa tambe den comunidad.

Pa loke ta misa Santa Teresita y scolnan den e vecindario, e mandatario a splica cu na e momento aki a ricibi un oferta y esaki ta den evaluacion pa mira con lo bay implementa e proceso aki.

Di parti di fraccion FUTURO, a pidi e minister pa tin mas transparencia den ehecucion di trabou di DOW. El a splica cu pa esaki loke por haci ta informa comunidad mas na momento cu tin proyectonan andando. El a indica cu na e momento aki mes tin diferente proyecto cu ta su mes ta bezig ta orienta su mes y ta hayando mas informacion riba dje, pero el a enfatisa cu esey sigur lo ta un aspecto caminda por duna mas informacion na comunidad.

Pa loke ta reorganisacion di DOW, e mandatario a indica cu e reorganisacion aki no ta cla. El a splica cu si wak bon con gobierno ta funciona, hopi biaha por bisa cu ta cuminsa un reorganisacion, y basa riba su experiencia, ora caba cu e reorganisacion aki y tempo pasa, e siguiente reorganisacion of adaptacion ta na ordo atrobe pasobra diferente cosnan ta cambia, manera por ehempel loke a pasa den caso di traspaso di e sistema di rioolering pa AWSS y mester reorganisa di nobo.