Recientemente Parlamento di Aruba a reuni cu Ombudsman, señora Jurima Bryson. Señora Bryson a duna un “update” di e trabaonan andando desde su nombracion dia 1 di october 2024. El a indica cu e tarea di set up e oficina y busca empleadonan lo tuma mas o menos 1 aña pa completa, pues pa october e aña aki, e oficina por tin su apertura.
Na e momento aki señora Bryson ta den e fase final pa recluta personal y pa fin di Mei 2025 el lo tin un bista caba si e tin suficiente hende cualifica pa haci e trabao.
Parlamentario Evelyn Wever-Croes (MEP) den un comunicado di prensa a indica cu un Ombudsman ta un defensor di pueblo, pues akinan tur ciudadano por yega cu kehonan riba trato of falta di reaccion di institutonan di gobierno riba tur tereno. E Ombudsman no lo trata cu casonan cu ainda por bay corte, pero lo trata proceduranan di violacion di derecho di hende, manera duna trato discriminatorio of no ta duna atencion na e persona. Den paisnan manera Corsou y Sint Maarten por a nota cu varios keho ta bin riba e tema di otorgamento di permiso, tereno y riba derecho di muchanan, y ta di spera cu na Aruba lo ta mescos.
Segun e comunicado a recorda, Ombudsman ta un logro di e gobierno anterior di Gabinete Wever-Croes I y II. Parlamentario Wever-Croes a expresa di sumamente orguyoso di e logro aki, mirando cu ta hopi duro e gobierno a traha pa realisa cu tur e leynan ta “in place” y cu e Ombudsman ta nombra. Y cu pa october 2025, e Ombudsman lo cuminsa traha pa asina duna defensa y proteccion na ciudadanonan contra un gobierno of institutonan di gobierno cu no ta duna trato husto.
