Recientemente, Parlamento tabatin un reunion cu SVB y AZV riba varios punto importante. Entre otro, a ricibi informacion tocante posibilidad pa aumento di pensioen, e remedinan cu AZV ainda no ta cubri, y e pago di prima di AZV pa pensionado.

Segun un comunicado di prensa di parlamentario Evelyn Wever-Croes (MEP), sinembargo, “locual a resalta mas cu tur cos ta e tantisimo promesa falso cu gobierno nobo a haci y ta haciendo.”

Pensioen di biehes

SVB a informa Parlamento di e costonan di e aumento di reparatietoeslag pa 2025 y e proyeccion pa añanan siguiente:

Proyeccion di gastonan reparatietoeslag:
2025:    94.9 miyon florin
2026:    121.8 miyon florin
2027:    127.7 miyon florin

Basa riba esaki, Parlamento a keda preocupa con e caha di pais Aruba lo carga esaki, y si tin espacio pa carga mas aumento manera e minister president Eman a priminti recientemente. Riba esaki SVB tabata categorico: no tin espacio den e fondo di SVB pa aumentonan substancial di e pensioen.

AZV

Entre otro, a toca e tema di remedinan. “Cu hopi fanfaria e gobierno nobo a bay AZV pa anuncia cu TUR remedi cu AZV tabata cubri, pero cu tempo di pandemia Hulanda a exigi pa stop di cubri, lo wordo cubri back door di AZV. Pero mesora Parlamento a haya e confirmacion cu actualmente no ta tur remedi cu pensionadonan tin meste, ta wordo cubri door di AZV, y cu tin varios remedi ainda cu e pensionadonan mes mester cubri, siendo cu tin un surplus di mas di 100 miyon florin den e fondo di AZV,” Wever-Croes a menciona.

Den Parlamento AZV a confirma cu berdad no tur remedi ta wordo cubri pa AZV ainda.

Pa loke ta e prima di AZV, Prome Minister Mike Eman a priminti recientemente di ta bay elimina e prima aki pa e pensionadonan, pa asina yuda pensionadonan haya mas placa den nan man. Sin embargo, segun Wever-Croes, Sr. Eman a engaña e pensionadonan, pasobra no ta e pensionado ta paga e prima di AZV. Pues esaki no lo haci ningun efecto riba e pensionadonan pasobra nan no ta esun cu ta paga e prima aki. Ta SVB ta paga e prima a e pensionado.

E lo ta un alivio si pa SVB cu no lo mester pag’e mas. Basa riba esaki, Parlamentario Wever-Croes a puntra director di SVB, Sr. Edwin Jacobs, si e por informa Parlamento ki impacto e eliminacion di e prima aki tin riba e fondo di AZV, y si a tene cuenta cu esaki tambe den e proyeccionnan di e surplusnan den futuro.

“Mi kier a gradici señor Jacobs pa recorda nos e tempo dificil cu Aruba y AZV a pasa aden ora cu Hulanda a pone presion riba Aruba y AZV pa corta 5 miyon florin pa luna (60 miyon pa aña) di e fondo di AZV durante un crisis di salud. Tambe ta di admira cu na momento cu e crisis a pasa, e ekipo di AZV a drenta den un negociacion cu Hulanda splicando nan kico di berdad por y kico no por, y danki na e esfuerso aki di parti di nan, Aruba a logra di sali di e presion aki sin cumpli ni un biaha cu e 5 miyon florin pa luna. Danki na esaki, e ekipo di AZV a haya hopi elogio di Secretario di Estado e tempo ey señora Alexandra van Huffelen, prome cu el a baha,” Wever-Croes a indica

El a conclui bisando cu “lo mas importante ta cu e Gobierno anterior di Gabinete Wever-Croes a laga ambos fondo di AZV y SVB hopi fuerte y bon para pa asina e comunidad di Aruba por haya un poco alivio pa loke ta e tema di salud, y mi ta spera cu Gobierno nobo aki sigui usa e fondonan laga atras pa yuda comunidad bay dilanti.”