E siman aki, parlamentario y lider di fraccion PPA, Otmar Oduber a comparti un mocion cu el a entrega den Parlamento na maart, den cual ta urgi gobierno di Aruba pa “pa henter di un periodo di 6 luna tuma un decision definitivo riba un edificio y infrastructura nobo pa KIA.”

Oduber a presenta e mocion durante e reunion publico no. 14 dia 28 di maart ultimo, cu tabata trata e aprobacion di presupuesto 2025 pa e ministerionan di gobierno.

Den e mocion, Oduber ta detaya e cantidad di reto y problema cu actualmente ta afecta e Centro Coreccional di Aruba, KIA.

“Segun diferente rapport internacional, e estado di e edificio di Korrectie Instituut Aruba y e infrastructura relaciona cu utilidad, ICT, sistema di seguridad y vigilancia ta sumamente deplorabel,” e mocion ta bisa, agregando cu “e estado deplorabel di e edificio en general no ta salvaguardia ni promove calidad di ambiente di trabou pa e empleadonan ni e calidad di e condicionnan di estadia pa e detenidonan.”

Segun Oduber, den ambos caso por conclui cu di ningun manera e edificio en cuestion ta cumpli cu e exigencianan legal y otro reglanan, manera di seguridad.

Tambe ta nota cu e estado deplorabel di e edificio en general no ta duna espacio mas pa mantene un sistema di regimen basico responsabel, cu ta necesario pa separa gruponan specifico di detenido (detenido pa motibo di seguridad of psicologicamente vulnerabel, detenido sentencia of cu ainda nota sentencia) for di otro.

Segun Oduber a detaya, ministerio di Asuntonan Interno y di Relacion den Reino Hulandes tin un suma disponibel cu ta parti di e gastonan total pa e trabou di renobacion urgente di KIA. “Renobacion di e edificio actual ta sumamente urgente, pero e decision denter di e prome 6 luna di 2025 pa un edificio nobo ta inevitabel,” segun Oduber.

Ademas, Oduber a nota cu “no tin suficiente personal den e unidad/seccion cu ta percura pa mantencion chikito di e edificio di KIA, cu tin consecuencia cu e edificio y infrastructura ta keda bira mas deplorabel.” Tambe tin un escasez enorme y structural di personal (entre 73% pa den Dienst Gevangeniswezen Aruba (DGWA) cu pa basta aña a sa di empeora te yega na e extremo cu hasta e ta menasa e seguridad di e personal y di e detenidonan.

Oduber tambe a resalta e falta di personal den KIA. El a nota cu e cantidad di personal di DGWA y KIA ta leu di cumpli cu normanan internacional y ta hopi menos compara cu e situacion na Curaçao y Boneiro, y e escasez enorme y structural di personal di DGWA y KIA ta pone un presion hopi halto riba e personal cu tin cu percura pa e operacion di KIA diariamente, loke ta causa cu nan tin cu traha overtime constantemente pa vigila e detenidonan y no ta keda tempo pa duna atencion, cuido y tratamento na e detenidonan. E escasez enorme y structural di e personal di DGWA y KIA ta causa cu e personal structuralmente ta sobrecarga (“overbelast”) door di ta traha overtime y no ta sosega suficientemente. Consecuentemente, e ta causa cansancio fisico y mental, aumento den “ziekmelding” y deterioracion den e bida di famia y e bida social. Ademas, e escasez enorme y structural di personal di DGWA y KIA ta obstaculisa proyectonan importante pa e detenidonan, specialmente e hobennan, pa nan proceso di reintegracion y resocialisacion den e comunidad. “Debi na e situacion sumamente deplorabel di e edificio y e escasez enorme y structural di personal di DGWA y KIA no ta traha obhetivamente, structuralmente ni efectivamente na resocialisacion y reintegracion di e detenidonan cu por limita esnan cu sali for di KIA bira recidivista,” segun e mocion.

Basa riba tur e puntonan aki, e mocion ta urgi gobierno di Aruba “pa denter di un periodo di 6 luna tuma un decision definitivo riba e un edificio y infrastructura nobo pa KIA y percura pa e fondonan necesario pa diseño di esaki.”

Tambe ta urgi gobierno pa “den e presupuesto di 2025 aumenta e post di mantencion pa cubri e gastonan necesario di renobacion cu ta urgente y indispensabel y otro gastonan riba aparato electronico di vigilancia.”

Otro punto cu ta urgi gobierno den e mocion ta “pa ehecuta den colaboracion cu instancianan relevante y programanan pa resocialisacion y reintegracion di detenidonan bira realidad” y “pa ehecuta programanan pa e detenidonan por ta activamente pa por lo o menos 4 ora na actividadnan (lesnan di planta mata, maneho di negoshi chikito, etc) cu ta yuda nan pa reintegra den sociedad, pa ehecuta programanan pa e detenidonan hoben por haya structuralmente debido atencion y cuido, segun nan necesidad (op maat), for di e profesionalnan specialisa (psicologonan, psikiatra, y pa ehecuta programanan pa e detenidonan hoben tambe por haya acceso na actividadnan (lesnan di planta mata, maneho di negoshi chikito, etc) cu ta yuda nan pa reintegra den sociedad.”

Ademas, ta urgi pa “denter di 3 luna percura pa e “Landsverordening penitentiaire beginselen” ABZOOS no.75 y e “lnvoeringsverordening Landsverordening penitentiaire beginselen” AB 2016 no. 60 bay na vigor via un “landsbesluit” y tambe pa e comision stipula den capitulo di dicho ley wordo forma y e miembronan wordo nombra; ff pa denter di 3 luna desaroya un plan (plan van aanpak) pa reforsa structuralmente e personal di DGWA y KIA (recluta), percura pa inversion structural den e personal (training y salud) pa por cumpli cu normanan internacional.”

E mocion a conta cu sosten di diferente parlamentario, cu a firma riba esaki.

Parlamentarionan di AVP, Marlon Sneek, Jennifer Arends-Reyes, Carlos Bermudez, Mike de Meza, Sonaly Fernandez-Acosta, John Hart, Cliffort Heyliger, Stephanie Sevinger y Otami Thomasia a vota contra e mocion.

Parlamentarionan di MEP, Endy Croes, Xiomara Maduro, Dangui Oduber, Hendrik Tevreden, Rocco Tjon, Shailiny Trom-Lee, Edgard Vrolijk y Evelyn Wever-Croes a vota nulo.

Parlamentarionan di Futuro, Gino Goeloe, Ruthlyn Lindor y Muzanine Wever tambe a vota contra.

E unico parlamentario cu a vota na fabor, tabata Sr. Otmar Oduber di PPA.

Asina e resultado tabata 12 voto contra, y un voto na fabor, cu consecuencia cu no a adopta e mocion.