ORANJESTAD – E siman aki parlamento lo ta basta activo cu varios reunion publico. Pero sigur un di nan cu lo hala atencion ta esun di e compania di Utilities Aruba NV, cu ta agrupa tanto Elmar como WEB. Un caso cu a culmina cu e retiro di director di Utilities, Frank Hoevertsz.
Parlamentario y lider di fraccion di MEP, Rocco Tjon a declara na Bon Dia Aruba cu e siman aki a habri cu un reunion den e comision fiho di asuntonan financiero. E meta tras di dje ta pa haya informacion di e diferente partner, entre nan Banco Central, pa loke ta e diferente leynan cu nos organo legislativo ta bay trata.
Ayera nan a trata e ley di Notario, y awe nan lo bay debati riba Utilities N.V.
Tjon ta haya cu esaki ta un topico cu a haya hopi atencion. E ta haya bon cu parlamento mes por haya sa exactamente kico e investigacion forensico a trece dilanti.
Segun e parlamentario, ta importante pa por scucha tambe for di gobierno, kico nan ta bay haci. Pero tambe cu precaucion nan ta bay tuma pa ‘evita cu e tipo di practica por bolbe tuma luga den futuro.’
Diahuebs eventualmente nan lo trata e ley winstbelasting y geldstelsel, pa bin cu impuesto riba productonan cu tin su efecto riba salud di hende. Nan ta leynan cu lo kier bin cune den e fasenan cu ta forma parti di e reforma fiscal cu gobierno a bin cune. Nan lo cera e siman aki cu un reunion publico diabierna, riba con e crisis plan social ta wordo ehecuta.
E ta un ley caminda a wordo aloca 13 miyon florin pa atende cu e retonan di e problemanan social cu nos comunidad ta pasando aden. Minister di asunto social, Glenbert Croes mester rindi cuenta dilanti parlamento con e plan aki ta canando y alocacion di fondo tambe.
Ora cu parlamento a aproba e ley di e crisis social plan, a wordo añadi un articulo caminda ta wordo fortifica e autoridad di parlamento pa loke ta control. Pues e minister en cuestion mester presenta na parlamento cada tanto luna pa duna un splicacion – segun Tjon – pa medio di cifranan tambe.
