Si kier papia di nivel
Parlamento ayera tabata den su ‘mode’ custumbra. Esey ta bon pa e parlamentarionan cu mester ta sinti nan mes ‘en su charco’. Pero pa e ciudadano comun y coriente no tin nada di aprecia den e idiotesnan cu cada biaha ta haci hende puntra nan mes pakico mester paga tanto placa na e circo aki.
E tema riba agenda no ta yuda tampoco: Husticia. Laga nos no cuminsa di biaha cu critica e ministro, pero e biaha aki su coleganan di partido cu ta demasiado riba e linea di defende un ministro cu ta bon capaz pa defende su mes. Oposicion tampoco no ta yuda den esaki, salvo algun bon momento unda por ripara algo di nivel den e debate. Por ehemplo na momento cu parlamentario Romero a haci pregunta tocante kico ta e futuro di KIA. E ministro a keda gratamente sorprendi cu un pregunta al caso, pero mester a daña e asunto mesora, bisando cu ‘e pregunta no ta loke e ta haya normalmente di oposicion’. Aparentemente e no a sigui su colega Bermudez ayera cu a duna catedra di con bo mester comporta bo mes como ministro. Manera den campaña na Merca nos ta tende e comentaristanan bisa cu e candidato mester actua ‘presidential’, ta spera aki di un ministro tambe cu e ta hacie. Nos tin ehemplo den cas.
Di otro banda e debate tabata decepcionante, den e sentido cu contenido a move bay patras atrobe, pa e usual tiramento di lodo take over. Tambe poco di contenido. Un dado momento ta cay e palabra ‘prevencion’ y ora bo kere cu ‘awor nos ta bay papia sense’, ta resulta cu tur hende ta pega ainda den medida cu ta represion y ‘damage control’. Pa mas cu reforsa cuerpo policial, KIA y reclassering, nos ta papiando di e cosnan ‘after the fact’. Prevencion ta ora bo ta inverti den e cosnan cu NO ta cay bao husticia, pero cu ta yuda trece nos hobennan den un otro ambiente total di educacion, tanto den famia, como den vecindario y na scol. Ta berdad cu a critica e ministro aki ora el a haci cierto observacion den e direccion aki, cu preveni ta cuminsa otro caminda y no na husticia, pero den esey mester dun’e rason.
E unico problema ta cu su gobierno aparentemente no ta comprende nada di esey tampoco. Contal cu e mester haci su trabao di represion bon, esey ta den debate awor, pero di prevencion den e berdadero sentido di palabra, nada. Hasta ta asina cu e poco cosnan cu tabata sucede den sentido positivo, manera e proyecto di guia pa hoben cu sali for di detencion, a keda elimina e aña aki, y no pa falta di exito, pero pa falta di…. placa. Si, pasobra esey tambe, ainda falta. Ta di aprecia cu ta un di su coleganan di partido a trece e asunto dilanti, menciona tambe pa oposicion, by the way, pa pidi e ministro reconsidera esaki. Ta di spera cu e ta hacie y inclui esaki den e extra placa cu ta haya, supuestamente. Ta keda sin embargo pa historia, cu e ministro mes no a bati e bel di alarma niun momento, mientras cu e por a hasta gana voto cu esaki, pero e no a mira e oportunidad.
Con tal cu e asunto ta un cu lo mester atende cu e Prome Ministro, pasobra prevencion den e berdadero sentido di e palabra ta abarca trabao di varios ministerio, di cual Husticia ta solamente un. Esey significa cu di su banda e ministro di Husticia mester defende su mes, pero no ta logra nada si e ‘lider’ no ta duna cara. Algun tempo pasa Ministro Presidente mes a haya un momento di lucidez y a pone algun di e cien y pico hendenan di su corte cuminsa traha riba un proyecto pa atende hobennan di scolnan secundario den oranan di atardi. ‘Haleluya’ a zona cerca varios persona envolvi, cu por fin gobierno na e nivel mas halto a lanta for di soño y cuminsa reconoce cu ta e cosnan aki ta ‘prevencion’. E alegria sin embargo tabata di corto duracion, pasobra ‘no hubo plata’, manera ta e constante den e tipo di asunto aki. Anto ainda mayoria di e base di apoyo di e partido den gobierno no kier comprende kico oposicion y otro bosnan critico kier men ora bisa cu e gobierno aki no tin un nocion di kico ta prioridad.
Un pueblo prospero, sano y feliz no ta depende solamente di haltura di su GDP. E ta depende di kico ta haci cu placa. Mescos cu den un famia bon organisa, pero sin e recursonan pa haci tur cos, mester pone prioridad, asina na nivel di pais tambe ta. Mejor dicho, mester ta. Pues prome cu cumpra auto grandi nobo, lo mester drecha e dak cu ta lek y cerca di cay… Lamentablemente nos ta biba den un pais unda tin un gobierno ciego cu ta prefera di organisa cos bunita pa nos nietonan corda nan, pero no ta drecha loke mester drecha. Y pa colmo nan a caba cu placa.
