Diahuebs dia 3 di juli a tuma luga un reunion parlamentario pa trata e presupuesto di TPEF (Tourism Product Enhancement Fund) pa aña 2025. E reunion, cual a haya e nomber “reunion maratonico”, a cuminsa di 8or di mainta y a dura casi 10 ora largo den cual parlamentarionan a dialoga tocante varios punto di preocupacion pa cu e fondo di TPEF y maneho di e sector turistico en general. Na final di reunion a aproba unanimamente e presupuesto di 3 pa 3,8 miyon florin.
Minister di Turismo Wendrick Cicilia tabata e figura principal den e debatenan di e reunion, unda el a presenta su vision pa cu e maneho di e fondo pa Turismo.
Segun minister Cicilia, actualmente e presupuesto pa TPEF ta ser exclusivamente aloca pa infrastructura di embeyecemento di Pais Aruba, sin tin espacio pa otro aspecto den e sector cu tambe ta di importancia. Cu esaki el a menciona e aspecto di naturalesa y capital humano. E mandatario a expresa su vision pa diversifica e presupuesto di TPEF pa inclui inversion den recursonan natural y Aruba su playanan, como tambe empleadonan den sector di hospitalidad pa asina nos hendenan tambe tin oportunidad pa mehora nan habilidadnan profesional den e sector y di e manera aki provee un servicio di calidad mas halto na bishitantenan.
A indica e intencion ta pa bin cu un agenda y proyecto di inversion for di e fondo aki cu ta transgresa pa 1 aña, esta cu e ta trece resultadonan duradero. Pa esaki e minister a afirma cu lo tin un projectmanager ken lo ta encarga cu e agenda aki.
Pa loke ta trata e evaluacion di e proyecto di inversion, e mandatario a splica su vision unda varios organisacion por entrega nan peticion pa por haya financiamento di TPEF, tanten cu nan ta bin na remarke di un di seis pilar clave. Esakinan ta inclui:
Si e organisacion ta bin na remarke na asuntonan di:
- Atraccion
- Seguridad
- Medio ambiente
- Cultura
- Conscientisacion
- Inversion
Un otro punto di importancia ta e preocupacion di tensionnan geopolitico specialmente den Norte America y e posible efectonan cu esaki por tin riba e desaroyo di Turismo aki na Aruba. Pa esaki minister a enfatisa cu den colaboracion cu varios institutonan, incluyendo Directie Buitenlandse Zaken y minister Plenipotenciario a compila un documento pa yuda nabega e efectonan di e administracion Mericano. E mandatario a splica cu e herment aki ta monitoria e desaroyo den asuntonan politico. Ademas a revela cu a crea fondonan cu crea incentiva den e mercadonan Norte y Latino America.
Tambe a menciona acuerdonan aereo cu Suisa y cu Royal Schiphol Group, cual tabata un punto di controversia den sala di parlamento.
Preocupacionnan tocante e MoU recien firma entre gobierno AVP-FUTURO y Royal Schiphol Group a bin for di e banda di MEP, principalmente di ex-minister di Turismo Dangui Oduber, ken a cuestiona e situacion di e negociacionnan aki. Segun e parlamentario, negociacionnan inicial cu gobierno MEP-RAIZ no a logra yega na su fruto debi na algun condicionnan di RSG cual gobierno di Aruba e tempo ey no a acorda cune, incluyendo e condicion pa e puesto di CEO keda den man di un persona di afo, un asiento den directiva y excepcion di ley di LNT pa nan oficialnan, entre otro.
Parlamentario Oduber a expresa cu ta preocupante cu despues di a hala na banda pa via di condicionnan cual a considera e tempo ey di no tabata beneficioso pa pueblo di Aruba, gobierno di AVP-FUTURO a firma un MoU apenas tres luna den gobernacion. Di su banda, minister Cicilia a enfatisa cu a firma e MoU cu RSG pa “continua cu cooperacion strategico” cu segun e mandatario lo ta beneficioso pa e desaroyo di AAA. Segun Cicilia, e decision aki a ser hustifica pa un rapport di ‘cost benefits’. Pa loke ta e detayenan specifico di e acuerdo, no a elabora mas riba esaki.
Parlamentario Oduber tambe a trece dilanti un caida di 10% den e grado di ocupacion den e ultimo lunanan, ademas di un caida di 5% den gastamento di turista. A enfatisa cu AHATA mes a confirma e caida aki y a expresa nan mesun preocupacion cu e desaroyo den e ultimo lunanan. Contestando na e pregunta aki, minister Cicilia a bisa cu no ta corecto cu tin un atraso den e desaroyo. A menciona cu Aruba tin un prestacion “fuerte y stabil” den henter Caribe. Ademas a splica cu den e cifranan di januari y juni di 2024 compara cu e mesun lunanan di 2025, a mira un crecemento di 3,3%. Tambe a compara luna di juni 2024 cu juni 2025, unda e mandatario a splica cu a tin un crecemento di 3,1%.
Aunke si a reconoce cu e grado di ocupacion a cay cu 0.6%, el a afirma cu gastamento di turista a crece cu 12%, aunke no ta cla si esaki ta relaciona cu aumento di prijsnan.
Un otro punto clave den e reunion tabata e introduccion di un amienda nobo relaciona cu e desaroyo turistico aki na Aruba. Parlamentario y lider di fraccion PPA Otmar Oduber a probecha di su tempo pa introduci e amienda aki cual segun e, lo tin e meta pa preveni mas construccion di hotel. Cu esaki a propone un ‘contigency bank’ di TPEF. Segun e parlamentario, e fondo aki lo ta principalmente destina na situacionnan unda cu hotelnan cu ya tin erfpacht y vergunning pa construi pero cu pa cierto motibo a ser desafia pa procesonan gubernamental y a declara claim riba esaki, gobierno por utilisa e fondo aki pa negocia cu e hotelnan ey, cu speransa pa por preveni mas construccion di hotel riba nos isla.
Aunke e amienda aki a atrae e interes di gobierno, a indica cu e amienda tin par buraco ainda, particularmente den asuntonan huridico y legal. Ultimamente, e amienda a ser rechasa, aunke segun e parlamentario di PPA, a sugeri cu por hinca esaki den un initiatiefwetgeving.
Bon Dia Aruba lo elabora mas riba e amienda aki den un otro edicion.
