Recientemente tabatin un reunion den Parlamento di Aruba, unda minister di Deporte, Gerlien Croes (Futuro) a presenta pa pidi gevoelens di parlamento tocante un rapport di Centrale Accountantdienst (CAD) tocante subsidio otorga na Aruba Sport Unie (ASU). E rapport di ASU, ademas di e solicitud di e minister, a genera hopi discusion y controversia den esfera politico di Aruba.

CAD a traha e rapport riba peticion di minister Gerlien Croes, tocante e subsidionan otorga na ASU na 2024.

Siman pasa, algun detaye di e rapport aki a filtra den prensa local, cu a reporta cu tabatin violacion di regla y rekisito pa subsidio cu a duna ASU. Particularmente, e enfoke tabata riba un proyecto pa Centro Deportivo Betico Croes.

E problema principal tabata cu a pone fondo disponible pa un proyecto di atletiekbaan, mini voetbalveld, y algun cos mas, mediante un acuerdo entre ex-minister di Deporte, Endy Croes (MEP) y ASU. Sinembargo, e manera con a haci e proceso aki no tabata corecto. Ta trata aki di un suma di 600mil florin, di cual 450mil a keda otorga caba, y e 150mil florin faltando mester keda entrega pa e minister actual, Gerlien Croes.

Segun e rapport di CAD, na final di gobernacion di Gabinete Wever-Croes II na september 2024, ASU a firma e contract cu gobierno pa e proyecto en cuestion, y tres dia despues a haci pago di e prome factura. Esaki a crea sospecho cu e proceso no a cana e manera debido. Segun relatonan den prensa local, maske e proyecto a keda presenta como un proyecto di gobierno cu ASU, ASU no tabata mucho involucra, sino ministerio di ex-minister Endy Croes a dirigi e proyecto riba su mes, incluyendo compra di material sin un destaho transparente.

Tocante e acusacionnan aki, parlamentario Endy Croes (MEP) a haci comentario a traves di un transmision en bibo riba Facebook. Croes a confirma cu tabatin un rapport di CAD riba e proyecto tras di Centro Libertador Betico Croes. Segun Endy Croes, minister Gerlien Croes “a bin cu su staf Parlamento cu tur e documentonan” unda el a “haci comosifuera cu ta ultimo ora a core prepara algo, cu ASU por ta no tabata na haltura di e proyecto, a duna nan placa pa nan bay paga, etc.”

Durante transmision, Croes a mustra un map bisando cu ta trata di e projectdossier, bisando cu a entrega esaki desde maart 2023. Segun Endy Croes, minister Gerlien Croes a “pretende cu ASU no lo ta na haltura di e proyecto, esey bo por destila un tiki.” Pero segun Endy Croes, esey no ta e caso.

El a bisa cu CAD a menciona e number di e projectdossier, y cu den esaki, “patras tin un carta di atletiekbond, firma tambe e tempo ey pa atletiekbond di un di maart 2023. Dus no ta algo cu a cuminsa na careda, ultimo ora prome cu mi a baha como minister, etc.”

“E carta di peticion aki tabata pa nan por haya un atletiekbaan patras di Centro Libertador Betico Croes,” Endy Croes a continua. Y a traha e proyecto aki, na e momento ey a entreg’e pa na 2024 por yega na e fondonan.”

Endy Croes si a reconoce cu tabatin critica di CAD pa cu e proyecto. “Berdaderamente CAD a reclama na punto 10 si mi no ta hera, CAD ta bisa ‘Het is al jarenlang gebruikelijk dat het landssubsidie voorschotten uitbetaalt aan door het land gesubsidieerde instelling zonder dat de subsidieverlening beschikking zijn voorafgegaan.’ Nan ta bisa cu e trayecto cu mester a cana tabata un bijzondere subsidie, dus mester a cana un otro caminda, pero al mismo momento, DWJZ ta bin despues di e rapport di CAD cu un bestedingsovereenkomst cu berdad ministerio a firma cu ASU, dus ASU a firma esaki, pa haya e 600mil florin di cual nan a haya caba 450mil. Dus e minister a bin awe pa pidi gevoelens di Staten al respecto e 150mil florin cu falta pa paga ASU.”

Sinembargo, den e reunion den parlamento y den e transmision riba Facebook, a bisa cu e conclusion di e conseho final na gobierno di DWJZ ta indica cu “het restante van het subsidiebedrag dient aan ASU te worden verrekt, aangezien de bestedingsovereenkomst rechtsgeldig is, subsidiegelden zijn begroot en het project nog niet is afgerond.”

Tocante e facturanan paga, Endy Croes a bisa cu “nos a reuni cu Johan Cruyff Foundation, nos a reuni cu CEDE Aruba, CEDE a reuni cu ASU. CEDE tambe kier a pone un proyecto casi mesun cos patras riba e mesun tereno, dus ful un proyecto aangaande e tabata. Den meantime djis pa pueblo ta na haltura, e materialnan a wordo cumpra, nan a yega Aruba – bo tin eynan mini voetbalveld, e atletiekbaan, a cumpra tambe si mi no ta hera e baseball 5 on 5, basketball 3 on 3, y ASU a pidi tambe un heki pa cera e tereno, pasobra nan sa tira hopi sushi eynan, tambe a bin. Dus e prome fase di e compranan aki ASU a haya placa, ASU a paga, containernan a yega, ASU a regel pa e containernan yega na su lugar. Dus no tabatin nada malo manera cu kier pinta den prensa den e caso aki.”

Reunion den Parlamento
 Loke a ricibi hopi critica tabata e hecho cu minister Gerlien Croes a pidi Parlamento di Aruba pa duna nan gevoelens – es decir nan opinion – riba e rapport di CAD y e pago di e 150mil florin cu falta pa ASU, mientras cu e minister no a laga su posicion cla.

Durante un conferencia di prensa ayera, parlamentario Otmar Oduber (PPA) a comenta tocante e situacion. “E siman aki tabatin un disputa, discusion den parlamento pa loke ta trata un gevoelens cu minister Gerlien Croes a bin pidi ariba ASU y fondonan cu mester bay pa e stichting aki,” Oduber a indica. “Corectamente parlamento den su totalidad – pasobra awe mi a mira cu pasobra el a crea friccion entre minister den su partido y Conseho di Minister ta purba laba man – e realidad ta cu tur cuatro fraccion den parlamento a bay di acuerdo pa manda un carta pa e minister, caminda cu e minister ta wordo mustra riba e hecho cu manera cu el a actua di bin parlamento pa busca gevoelens no ta e manera corecto y adecuado, pasobra bo no a pone kico bo posicion ta.”

Esaki tambe parlamentario Endy Croes a critica. El a bisa cu e rapport di CAD a duna e minister dos opcion. Uno, pa paga e 150mil florin y despues regla esaki mediante un vaststellingsbesluit, of habri caminda pa ASU haci un peticion nobo pa un bijzondere subsidie, cu lo ta un proceso mas largo.

“E minister a bisa si kiden cu e kier e caminda di mas lihe pa no perhudica e operacion di ASU, empleadonan, etc, pero e no a pone esey den su peticion.”

Oduber tabatin e mesun critica. “Gobernacion ta tuma decision, y ora bo ta tuma decision, bo ta tuma risiconan. Y den e caso aki, e minister encarga cu loke ta trata deporte, tin cu tuma un decision di e direccion cu e kier bay den e caso di ASU, caminda cu no a regla e documentacionnan manera mester ta.”

Oduber a enfatisa cu “e minister mester bisa Parlamento cu ta e direccion ey e kier bay, y no lag’e habri pa parlamento su interpretacion of pa parlamento bay sinta den stoel di gobierno pa dicidi den ki direccion e tin cu bay.” Ora e minister fiha su posicion, “e ora ey, e minister por haya un gevoelens for di parlamento,” segun Oduber.

ASU mester pidi subsidio di nobo

Ayera, medionan local a reporta cu minister di Deporte a informa ASU cu no lo ricibi e restante 150mil florin pasobra no a ricibi sosten di parlamento pa regla esaki emdiante un vaststellingsbesluit. Esaki ta nifica cu ASU mester pidi subsidio y cana e caminda di nobo pa ricibi e placa necesario pa nan operacion.