Durante un reunion reciente entre Ministernan Xiomara Maduro, President Evelyn Wever- Croes y Minister Chris Romero y Minister McWilliam di Corsou, a discuti e posibilidad di conectividad maritimo.
Conectividad maritimo entre islanan y Fast Ferry
A discuti e posibilidad di por haci uzo di e conectividad maritimo di e barco Don Andres.
Esaki ta e barco cu ta nabega entre e islanan ABC. Pronto Don Andres lo bay cuminsa cu su ruta nobo for di Sto. Domingo pa Corsou pa asina trece fruta y berdura di Sto. Domingo pa Corsou y cu Aruba por haci uzo di e oportunidad aki tambe.
Alabes a discuti e desaroyo di e proyecto di Fast Ferry y Minister McWilliam a informa cu e parti financiero a ser regla y cu pronto e ta spera cu por formalisa esaki.
Pa algun tempo caba ambos isla ta den dialogo pa cu e Fast Ferry di cual e proyecto ta un opcion pa e ciudadanonan di Corsou y Aruba lo por disfruta, como tambe pa mehora e aspecto turistico y economico. E proyecto aki a hala atencion cu varios inversionista. Minister Romero a bisa e tempo ey cu tin un cooperacion entre gobierno di Aruba y Corsou, cu tin cierto dificultad awo. “Corsou tambe tin e Fast Ferry den plannan, pero esey ta un proyecto cu ta bin di dos banda y Aruba no por dicidi riba esey. Ora nan ta full cla pa sigui, nos ta bay sigui cune”.
