Simposio “The Restauration of the Common Good” organisa pa Fundacion Digna Lacle Herrera, Plataforma Hobennan Profesional y Fraccion di AVP, a inspira un marco di referencia fuerte pa nos comunidad tin como guia pa maneha temanan hopi profundo.

Un aspecto cu a resalta na e simposio ta e hecho cu varios lider spiritual prominente den nos sociedad a enfatisa e necesidad pa nos comunidad social y politico reconecta cu locual cu ta uni nos; E BON COMUN!

Lidernan spiritual Pastor Calix Ashby, Domi Peter Hazenoot y Pastor Jairo Maduro tabata oradornan invita pa duna un contribucion na e simposio dunado un dimension profundo na e tema di; E Bon Comun.

Pastor Calix Ashby a enfatisa e importancia di E Bon Comun como un guia moral pa nos comunidad, e la comparti un mensahe cu captiva e atencion di e audiencia;

“ E Bon Comun ta crea e condicionnan necesario pa tur ciudadano por florece, y esaki no ta un ideal utopista. E Bon Comun ta promove dignidad humano, relacionnan sano, participacion genuino y bon administracion di recursonan. Atendiendo nos mes na e Bon Comun ta garantisa un desaroyo cu ta inclui tur hende y no ta laga niun hende keda atras”

Pastor Calix Ashby a anima nos comunidad pa mira cu den e bon comun tin un responsabilidad moral y etico pa tur sector y e ciudadania. E ta un responsabilidad comparti cu cada un di nos tin pa por realisa e restauracion di e Bon Comun.

Domi Peter Hazenoot di e Kerki Protestant di Piedra Plat a sigui construi ariba e base cu a wordo estableci ariba e tema di E Bon Comun. Cu un lectura centra ariba e origen di e Bon Comun e a delinea e responsabilidad y e solidaridad comunitario. Domi Peter Hazenoot a recorda nos cu pa realisa E Bon Comun e ta bay rekeri un esfuerso colectivo den cual famianan, congregacionnan, clubnan, fundacionnan mester contribui pa nos comunidad por florece. Nos mester recoge for di nos sentido di amor prohimo e curason pa cuida esnan mas vulnerabel den nos comunidad.

Domi Peter Hazenoot a describi con E Bon Comun ta conduci cu condicionnan social ta wordo crea, pa asina habilita nos ciudadanonan pa nan por florece y cumpli cu nan proposito aki na mundo. Dominee Peter Hazenoot a recorda nos cu e concepto di sirbi E Bon Comun conoce un trayectoria largo di historia, y ta inspira pa e eciclyca “Rerum Novarum” cu a establece normanan pa guia un comunidad pa asina nan por ta mas harmonioso, prospero y solidario cu otro. Respet pa e dignidad humano ta central den esaki.

Pa clausura y corona e anochi di simposio; Pastor Jairo Maduro a dirigi un lectura den un forma autentico y original. Un mensahe confrontativo cu ta reta cada un di nos pa reflexiona ariba nos propio estilo di bida. Pastor Jairo Maduro a enfatisa cu Creador e crea humanidad pa nos convivi un cu otro. E ta importante pa nos instrui nos generacion nobo den convivencia, den amor pa prohimo y solidaridad. E Bon Comun ta exigi Gobernante cu ta pa reconoce e dignidad di cada ser humano y ta pone como prioridad sirbi un comunidad den su totalidad. No pa algun, of pa un sector, pero pa tur.

Pa e meta di simposio, establece e tema di Bon Comun, den un forma mas amplio cu unicamente como un punto referencia pa politica e lidernan spiritual a contribui grandemente cu nan lectura pa ilustra e rol colectivo di cada sector di comunidad den aspira y traha pa realisa e bon comun.

E lider di AVP mr. Mike Eman a keda hopi gradicido pa profundisacion aki realisa pa e lecturanan di e lidernan spiritual. E Bon Comun mester ta pa nos e compas moral pa un politica di speransa y den esey unificacion di nos pueblo tras di un meta comun ta urgentemente necesario, Eman a enfatisa. E Bon Comun mester ta algo cu nos tur ta mira y sinti su necesidad como guia y como meta Eman a conclui.