Pronto lo anuncia e siguiente klas di defensa propio
E fundacion pa formacion politico di Partido MEP, Fundacion Formacion Politico Nelson Oduber, desde su fundacion ta dunando curso, tayer y charlanan riba temanan politico pero tambe riba otro tereno cu por yuda ciudadanonan di nos pais.
Diahuebs 25 di mei ultimo, e fundacion a organisa e “Explosive Self Defense Class” pa hende muhe. Explosive Self-Defense ta un tecnica cu hopi polis rond mundo ta siña pa ora nan mester defende nan mes. Esaki sigur ta algo hopi positivo y importante pa nos damanan por siña pa si acaso nan haya nan mes den situacionnan unda cu nan mester defende nan mes. Durante e les di defensa propio, e damanan a haya conseho con pa preveni pa haci nan mes un target accesibel y a siña tecnicanan con pa defende nan mes si nan bira victima di un asalto.
Lider di MEP, señora Evelyn Wever-Croes ta gradici Michella Steenvoorde-Lacle pa organisa e sesion aki di defensa propio pa hende muhe. Un danki special tambe pa instructor Egmond Molina y na Alvin Molina pa asisti durante e les. Pronto lo anuncia e siguiente ‘Explosive Self Defense Class’ y Partido MEP ta encurasha mas dama pa inscribi pa asina nan por haya conseho y siña tecnicanan con pa defende nan mes.
