Diasabra dia 30 di Augustus, na sede di MEP, e partido hunto cu su sostenedornan a rindi homenahe na señor Ady Thijsen. Lider di partido, Evelyn Wever-Croes a expresa cu Ady no solamente tabata un candidato riba lista di MEP, sino e ta un bon politico, un bon amigo y un bon compañero di partido.
“Despues di a sirbi su pais dignamente pa 20 aña como politico, señor Thijsen ta retira poniendo asina un punto na final na su carera politico,” segun un comunicado di MEP. Den su discurso, lider di partido a bisa Sr. Thijsen pa no pone un punto sino un coma, pa asina partido MEP por sigui conta cu su experiencia, consehonan y sosten cu semper tabata di gran ayudo.
Señor Thijsen durante e añanan como representante di pueblo a sirbi Aruba den varios posicion. E tabata presidente di Parlamento, parlamentario, lider di fraccion, representante di Aruba na Union Europeo, y Minister Plenipotenciario na Hulanda. Tur trabou cu señor Thijsen a haci, el a haci cu dignidad, sirbiendo Aruba pa bon.
“Mi tabatin e honor di ta presente e dia cu el a wordo presenta como Minister Plenipotenciario na Hulanda y mi tabat’ey dia cu el a tuma despedida tambe. Mi ta hopi impresiona di e “netwerk” cu señor Thijsen a laga atras, paso no solamente el a cera relacionnan importante pero el a crea un brug pa Aruba.
Segun e comunicado, ta di lamenta cu awe ainda no tin un Minister Plenipotenciario na Hulanda pasobra e ta haci Aruba daño. Pero esaki ta e escogencia di e Gobierno actual.
“Ady a haci un bunita trabao pa Aruba, y p’esey e famia di MEP a bin hunto pa gradicie y pa dun’e e honor cu e merece. Un biaha mas Ady, danki pa a sirbi nos partido, y danki pa a sirbi Aruba,” lider di partido a expresa.
