Poco despues di fayecimento di lider pa mas di 50 aña, Benny Nisbet, Partido Patriotico Arubano (PPA) ta bolbe riba scenario cu un lider nobo. Lisette Malmberg, empresario y lider social pa varios decada, a dicidi pa acepta e oferta di e partido pa ta e proximo lider y drenta arena politico di biaha, en vista di eleccion parlamentario programa pa dia 25 di juni proximo.
Esaki lo por significa un posible retorno di un di e partidonan mas antiguo di Aruba den parlamento, despues cu pa hopi aña PPA no a conoce participacion parlamentario mas.
Como palabra clave den su campaña ta hiba e palabra Transforma, cu ta indica e cambionan profundo cu segun e lider y e partidolo mester tuma lugar den nos comunidad riba diferente tereno. E website transformaruba.com na cual e partido ta referi, ta duna un promer impresion di e terenonan cu e partido den su bachi nobo ta considera di importancia. Nan ta “Gobierno y Liderazgo: liderazgo mester ta efectivo, transparente y cu contabilidad.” Tambe “Famia y Comunidad: fundeshi di comunidad; Recurso Natural: mester mantene esakinan di manera sostenible. Tambe enfasis riba Desaroyo Economico, Finanzas (publico) y Eduacion.
Den curso di e siguiente dianan Bon Dia Aruba lo extende mas informacion, incluyendo posible entrevista cu sra. Malmberg.
