Partido RAIZ a tene su di shete sesion di Academia di Bon Gobernacion 2025 (ABG), cu e tema “Reforma Democratico”, presenta pa Sr. Miguel Mansur, economista, inversionista y ex-Miembro di Parlamento (2021–2025), y fundador di partido centrista-liberal ACCION 21.
Durante e presentacion, Sr. Mansur a comparti un analisis profundo riba con Aruba por sigui avansa na materia di democracia moderno, transparencia y responsabilidad publico. E la bisa cu Reforma Democratico no ta un concepto teoretico, sino un necesidad fundamental pa un pais chikito cu un economia abierto, expone na retonan global y regional.
Sr. Mansur a enfatisa cu un sistema democratico fuerte mester ta basa riba:
Institucionnan independiente cu ta traha na transparencia;
Un sistema robusto di ‘checks and balances’;
Un proceso electoral moderno cu ta garantisa participacion y claridad;
Decisionnan basa riba data y evidencia, no riba impulso politico;
Un cultura civico cu ta pone integridad y responsabilidad den su nucleo.
E la indica cu: “Un democracia fuerte no ta basa riba persona, sino riba institucionnan cu por sostene e pais den bon tempo y den temponan dificil.” Segun Mansur, Aruba mester sigui fortifica su institucionnan pa crea durabilidad, confianza publico y un gobierno cu por planifica pa futuro.
Reforma den contexto di dialogo nacional y regional
E presentacion tabata inclui un mirada mas amplio riba desaroyo den Reino, particular den discusionnan cu ta surgi rond di e Rijkswet y su impacto potencial riba autonomia y gobernacion. Segun Sr. Mansur e discusion aki ta resalta un realidad importante: Aruba por logra un mayor stabilidad democratico ora cu su institucionnan y procesonan interno ta opera na un nivel optimal.
Sr. Mansur a splica cu, mescos cu algun tema ta den man di autoridad competente pa investiga, e realidad actual ta pone na frente un punto crucial: confiansa di pueblo ta depende tanto di ley mes como di aparencia di integridad. E tema di transparencia y integridad den servicio publico ta bira cada biaha mas relevante pa pueblo di Aruba.
Un sesion participativo y orienta na solucion
E sesion a finalisa cu un dialogo interesante entre participantenan, caminda tabata trata:
Con ciudadanonan por contribui na un democracia mas fuerte;
Medida concreto pa modernisa e sistema electoral;
Rol di educacion civico den fortalece cultura democratico;
Maneho di conflicto di interes y supervision independiente den institucionnan publico.
E participantenan a expresa aprecio pa claridad y profundidad cu Sr. Mansur a trece na e tema, y pa e forma cu a conecta e contenido teorico cu realidad actual di Aruba.
Compromiso di RAIZ
Partido RAIZ ta sigui destacando cu formacion, conscientisacion y dialogo abierto como base di un generacion di lider y ciudadano cu ta pone integridad, transparencia y pais na prome lugar. E programa AGB ta contesta un necesidad real: un arkitectura democratico cu ta solido, inclusivo y prepara pa futuro.
Siguiente Sesion – Staatsrecht cu Sr. Luciano Milliard
E siguiente sesion di AGB 2025 lo tuma lugar diahuebs 20 di november na Botica Oduber Building, riba e tema “Staatsrecht”, presenta pa Sr. Luciano Milliard, docente di derecho constitucional na Universidad di Aruba. Sr. Milliard lo sigui elabora riba e funcionamento di nos marco constitucional, e rol di poder estatal, y con gobernacion democratico ta proteha su fundamentonan legal.
Fecha: Diahuebs 20 di November
Ora: 7:00 PM – 9:00 PM
Lugar: Botica Oduber Building, Caya Betico Croes 103
Partido RAIZ ta invita tur ciudadano pa sigui forma parti di e programa educativo, cu ta contesta un demanda real pa bon gobernacion na Aruba.
