Supervision financiero externo ta mustra un panorama positivo pa Aruba. Pa corda, hasta Hulanda mes ta bao supervision financiero di Bruselas, Partido RED Democratico ta opina.

E Rijkswet mester contene dos regla cla:

1. E deficit di presupuesto no por yega mas cu 1.5% di Producto Interno Bruto (BBP).

2. E debe externo no por yega mas cu 40% di Producto Interno Bruto (BBP).

Esakinan ta regla cla pa mara man di politiconan iresponsabel y pa proteha placa di pueblo. Sinembargo, tin partidonan cu ta usa “autonomia” como hustificacion pa sigui keda cu man los y malgasta.

RED den gobierno a defende entrada di e Rijkswet como un ultimo recurso pa para e gasto iresponsabel, pero e votadornan no ta castiga politiconan cu ta malgasta, ma ta sigui premia AVP y MEP – dos partido cu a causa e collapse financiero di Aruba. Mas ainda, Parlamento di Aruba ta un stempelparlement sin control real riba gobierno.

Supervision externo, p’esey, ta un bonbini: pa proteha balor di nos florin y pa pone regla serio riba maneho di nos finanzas.

Autonomia a wordo usa hopi biaha pa defende interes di politiconan iresponsabel di AVP y MEP. Awor e momento a yega pa sacrifica un tiki di autonomia financiero, pa defende e interes mas grandi: Placa y futuro di pueblo Arubano.

Nota di redaccion: E articulo aki ta opinion di e autor y no ta refleha opinion di Bon Dia Aruba.