Den un conferencia di prensa semanal di partido RED Democratico a bin dilanti diferente puntonan di interes den cual nan a duna nan opinion y tambe nan a enfatisa cu den proximo biaha pueblo mester vota consciente y pone hende corecto goberna e pais aki.

Ricardo Croes ex-parlamentario y miembro di e partido a trece dilanti cu e pais ta bibando diferente problema, entre nan muchanan cu ta bay scol sin desayuno y cu esaki ta algo cu tin su tempo caba y cu gobierno no tin manera di cubri e gasto aki pero si tin pa haci otro proyectonan.

Igualmente el a expresa cu partido RED Democratico a firma un acuerdo di gobernacion ora cu nan a drenta den gobierno y nan a presenta un pilar economico nobo cu e minister di Finansa y Economia na e tempo ey, Xiomara Maduro a yega di menciona den parlamento, igualmente minister di Salud Dangui Oduber y otro ministernan tabata involucra y tur tabata di bisa cu e pilar economico nobo di casi mey biyon florin pa aña bon ehecuta “unda a keda awe? Ni un caminda, pero a bo kiermen cu partido RED no a cumpli”, el a bisa.

El a reclama cu gobierno actual a yega di sinta cu 21 parlamentarionan pa cual parlamento ta componi den cual tur di nan tabata di acuerdo cu legalisacion di cannabis durante debate pero despues ni un mocion di pro-legalisacion a wordo entrega.

“Unda e ley cu a yega parlamento dos siman cu prome minister a manda gobierno di MEP-POR-RED cas, e ley di legalisacion di cannabis medicinal a yega parlamento, e no a wordo trata, nunca mas, ni e palabra ta wordo menciona den parlamento”, el a sigura.

“Bo no ta ripara cu awor mas cu nunca nos sector primario mester di atencion? Ciudadanonan cu no a planta nunca a cuminsa bira consciente y a cuminsa planta pero den sector di agricultura, net net, nada”, Croes a declara.

Igualmente, el a bisa cu gobierno kier pa comerciantenan importa pa asina ey por haya impuesto segun el a sigura y cu “no tin nada cu ta mustra cu e gobierno de facto aki mustra cu e hende ta central”.

Ademas, el a señala cu gobernantenan mester ta un hende integro pero “ta parce cu esey tampoco bo no ta worry cune, politiconan cera ta wordo scogi pa sinta den parlamento y otronan cu ta wak spirito no por ni contesta e pregunta ‘no mi no ta un sospechoso mi ta un testigo y si mi ta un sospechoso mi ta bis’e mi ta un sospechoso pero mi no a comete ni un fechoria y esey mi lo prueba”, el a enfatisa.

Un otro problema cu el a trece dilanti ta esun di tairanan caminda el a accentua cu Aruba ta un pais cu tin e solucion pa combirti’e den combustibel, den cual e ta sostene cu companianan por tin e posibilidad pa deal cu desperdicio aki haci esaki, “pero nos ta sostene transparencia, mester tin un destaho publico pa pueblo y parlamento sa kico ta pasa”.

Pa finalisa, el a laga un mensahe na pueblo cu tabata bisa “lanta for di soño, educa bo mes, dirigi e pais aki cu bo voto, pone hende corecto goberna e pais aki y mi ta pidi Dios duna nos tur forsa y abo tambe”.

Di su parti, Armando ‘Rudy’ Lampe ex-minister di Enseñansa y Desaroyo Sostenibel y tambe miembro di e partido aki a papia tocante un declaracion cu presidente di Sindicato SEPPA, Magaly Brito a haci dianan pasa tocante trahadonan di limpiesa di SKOA, di esaki, el a sigura cu a trahadonan a cobra nan salario conforme e sentencia di hues.

Segun Lampe, Brito a declara cu prome minister Evelyn Wever-Croes prome cu eleccion a bisa cu e ta bay regla e trahadonan di limpiesa por cobra segun status di ambtenaar, mientras tanto, e minister nobo di Enseñansa, Endy Croes a sigura cu e ta bay regla esey y presidente di SEPPA tambe a bisa cu ex-minister Lampe a wordo pinta malo y nan a priminti prome cu eleccion cu nan si ta bay regl’e y ta te siman pasa cu nan a cuminsa cobra manera Lampe a menciona hopi biaha caba, cu nan mester cumpli cu sentencia di hues.

El a mustra un carta cu el a manda na su coleganan dia 16 di mei di aña 2020 unda cu den cual el a papia di emocionnan den conseho di ministernan “a bay for di sla” unda el a referi na un reunion di conseho di minister di diabierna 15 di mei di 2020 unda cu segun el a sigura emocionnan a bay asina halto cu a pone preshon riba Lampe pa e bay contra ley, contra sentencia di hues y por cumpli cu e trahadonan di limpiesa di SKOA.

Di esaki, el a comenta cu na final di e carta el a indica cu “SKOA cu a causa un daño miyonario na pais Aruba, nan ta bin cerca minister presidente y el a priminti cu e si ta bay solucion’e. Aworaki e berdad a sali na cla y mi ta espera cu e pueblo ripara ken di e minister president, minister di Finansas cu ma pidi for di 2018 pa coregi e situacion aki, pa no laga e daño financiero na pais Aruba bira mas grandi, ta nenga di haci e coreccion y prome cu eleccion nan a bay manipula e sentimento di trahadonan di limpiesa”, Lampe a declara.

Ademas, el a comenta cu “pueblo en bes di castiga esun cu a manipula y cu ta hunga cu su sentimento e pueblo a castiga nos cu a bisa ‘from day one’ cu esaki ta e berdad y nos no por gaña bo unda e presidente di SEPPA a bisa cu nan no por a cumpli cu e promesa y a nan a wordo premia”, el a bisa.

Mesun cos e reformanan fiscal unda cu e mesun sistema cu segun el a sigura MEP a scoge pa e BBO acumulativo no ta transparente ta duna e posibilidad pa no cumpli cu impuestonan, “nan a bay contra nos proposicion cu por a genera hopi mas entrada, cu tabata trata di un entrada di BTW crioyo di 3% so unda nos a bin cu un amienda riba e ley di BBO”.

Di esaki, manera Lampe a declara minister presidente a declara cu BTW no por bay door pa motibo cu nan a compronde cu prijsnan den supermercadonan lo no baha y no por controla si den e prijs tin e BBO inclui y ta p’esey cu el a presenta un amienda e tempo ey pero cu nan a bay contra dje.