Partidonan chikito… Por crece, pero con…?

Den ultimo dianan nos a tende hopi comentario tocante partidonan grandi cu a bay atras, y di partidonan chikito cu a surgi y a acapara un espacio mas amplio cu nunca antes den parlamento. Inmediatamente ta surgi e ora ey e pregunta, o comentario, si e partidonan chikito nobo lo bay dura riba escenario politico. Ta mustra riba pasado unda nos tabata mas biaha na e punto aki, cu partido(nan) prometedor, un mas cu otro, pa despues ripara cu nan no ta logra crece. Esey ta pasobra nan no por a convence un publico mas amplio cu nan por ta un alternativa? Esey por ta un conclusion – obviamente – pero no tin mas di explora den esaki? Nos ta kere cu si.

Un di e factornan cu ta hunga un papel importante ta cu e dos partidonan grandi no ta grandi solamente pasobra nan tin asina hopi simpatizante, pero segun nos opinion pasobra nan tin ‘organizacion’. Nan tin un structura organizativo cu ta abarca tur skina di e isla y hasta den tempo malo, cu nan ta perde hopi simpatizante cu no ta pertenece na e base, nan ta mantene suficiente pa ta presente tur caminda. Pa un partido chikito esey ta keda un lucha dificil, pasobra bo no tin e red amplio ey di sostenedor y esey nos por mira riba dia di eleccion mes. Ta e partidonan grandi tin hende na e urnanan, hopi menos e chikitonan.

Tin mas desbentaha, manera e falta di recurso financiero pa hiba campaña. Mester bisa si cu nos por mira un cambio den esey, unda un grupo mas grandi actualmente no ta interesa mas den bandera y otro material di campaña, pero ta prefera di haya mas informacion kico un partido kier haci. Awor, aki tin un punto di mehoracion pa haci, pasobra entre comunica digitalmente y duna bon informacion tin un mundo di diferencia. Nos a mira lamentablemente hopi propaganda – digital – pero poco informacion concreto. Claro cu nos a comprende cu mayoria di e partidonan no tabatin gana di mustra nan cartanan, pasobra tur cos cu ta bay sucede den e proximo luna y añanan, ta directamente relaciona cu e acuerdo cu Hulanda, unda por cierto a caba di sali e tercer version di e ‘Uitvoeringsagenda’ te cu september. Por mira cu varios trayecto a topa cu retraso, algo logico den cualkier proceso compleho. Sin embargo, e acuerdo no a cambia di contenido y esey ta implica cu na mesa di negociacion lo mester papia en detaye tocante tema importante manera reduccion di gasto pa cuido y gasto di personalden servicio publico tambe. Despues di e euforia di victoria electoral awor ta bolbe na e realidad manera e ta aparece nos dilanti. Mas di esaki en detaye den e edicion aki.

Pero pa bolbe na e tema inicial, ta un tarea primordial pa cada partido chikito, si nan ta desea di sobrevivi, cu nan mester crece, den presencia, si no ta fisico den cada bario, anto e mester ta a traves di un metodo di contacto y comunicacion cu ta resulta efectivo. E medionan t’ey, e ultimo lunanan di campaña a proba esey, pero pa expande ta keda un desafio. Esaki ta pasobra un parti sustancial di e poblacion ta tanto pega na medionan mas tradicional di comunicacion, como na temor pa loke nan no conoce. Esey ta implica cu e partidonan nobo lo mester gana confianza di mas hende cu esnan cu a apoya nan den e eleccion aki. Con ta haci esey semper ta e arte politico, y ta diferente pa cada un. Nos lo bisa cu ta importante mantene un bon mezcla entre sinceridad y integridad. Bisando esey nos ta consciente cu nos a caba di menciona un di e palabranan mas malusa den e campaña aki, y den e ultimo añanan tambe. Sin embargo, nos no por descarta e necesidad di esaki den e gobernacion cu ta bay cuminza awor. Si di tur banda ta grita cu nan tur ta ‘integro’ nos lo bisa anto cu ‘tur hende ta integro te ora proba lo contrario…’

Aki ta unda e partidonan nobo, cu awor ainda tin e beneficio di duda, mester ta cauteloso. Demasiado biaha nos a mira politico nobo cuminza bon, pa despues di poco tempo cuminza mustra tur e mal custumbernan cu e dos partidonan grandi a refina te cu el a bira un arte. E ta cuminza desde e promer dia den Bestuurskantoor cu e bay y bin di e ‘beneficiadonan’ di campaña cu ta bin cobra pa loke nan a presta, berdad of no, den campaña. Despues, segun e cartera cu un partido tin, ta sigui e otronan cu ta kere cu pasobra nan tin un relacion di simpatia o hasta mas cu un partido, cu nan por haya tur tipo di fabor, cu ta varia di trabao, proyecto, tereno, permiso di tal o cual indole. Promer cu nos frega nos wowo, a adapta na e practica di semper y ademas, manera semper, ta corta gran parti di comunicacion cu esnan eyfor, pasobra no tin gana di bay tende nan critica. Asina nos a mira decadanan largo e partidonan chikito, cu poco excepcion, adapta rapidamente na e cultura partidario cu e grandinan tin. Y riba e mercado di fabor aki, ta dificil gana nan, pesey nan ta grandi.Partido chikito por crece, pero no repitiendo pasado.