PDVSA ta kibrando… Y unda Aruba a keda?

E ultimo noticianan ta cu, aparte di e sancionnan Mericano, awor companianan priva ta buscando legalmente di logra nan derecho, y ta embargando propiedad di e empresa mas importante di Venezuela, PDVSA, specialmente den Caribe. Esaki automaticamente ta trece nan den e parti Hulandes, unda varios isla, St. Eustatius, Bonaire, Curaçao y Aruba tin actividad economico den cual e compania ta envolvi. Cada isla ta presenta un situacion diferente y ta duna diferente opcion pa e compania ConocoPhillips yega na pone man riba propiedad di PDVSA. Na Bonaire, St. Eustatius y Curaçao embargo ta den proceso caba, mientras cu na cierto momento esaki por ta e caso pa Aruba tambe. Pa Curaçao e consecuencia por ta bastante serio, den e sentido cu e refineria por keda paralisa, sin material pa traha cu ne, loke ta causa cu e empleadonan ta keda sin trabao, y ademas e isla lo mester importa combustibel di otro luga pa abastece e mercado local.

Pa loke ta Aruba, no tin noticia ainda di accion legal di Conoco aki, aunke ta menciona Aruba den e noticianan di entre otro Reuters. Lo no trata di e refineria, cu no ta opera y no ta interesante, aparte di cu e ta propiedad di Aruba y no di PDVSA. Loke si por ta interesante ta e crudo cu PDVSA tin almacena na Aruba. Cuanto esey ta exactamente, no ta di nos conocemento. Den e caso cu yega asina leu, e consecuencianan ta primeramente pa Citgo Aruba, cu ta explota e terminal aki, y pa PDVSA mes. Aruba no lo sinti e problema di importacion di combustibel, ya cu esaki pa varios decada ta bin di exterior caba. Ademas esaki ta na encargo di e compania FMSA, subsidiario di Refineria di Aruba NV, y no tin nada di haci directamente cu Citgo.

Pero, nos mester analisa e situacion aki for di un perspective mas amplio, pa por balora kico e señalnan aki por significa pa nos situacion, particularmente relaciona cu e refineria. Aparentemente nos ta yegando na e fase, unda cu no solamente e presion riba Venezuela ta bin di Merca y otro pais, pero tambe tin varios compania cu ta ganando nan caso contra Venezuela, pa motibo di nacionalisacion di nan propiedad na e pais aki y pa debe no paga. No ta trata solamente di sector di petroleo, pero tambe den sector di explotacion di oro. Por lesa di un caso asina den e edicion aki. E casonan ta trata hunto di varios biyon dollar, na un momento cu e pais tin problema grandi pa cumpli. Tambe tin accion den corte na Merca di un compania proveedor di servicio na PDVSA, cu a acepta un promesa di pago (na Spaño: un pagaré), pero awor si kier cobra. Na tur tin mas di dos biyon dollar riba caya, di sigur 10 compania cu a brinda servicio specialisa na PDVSA, y na prome instante a acepta pagaré.

Y esaki no ta tur. Riba tereno di debe tambe lo por tin accion. Algun aña atras PDVSA y gobierno Venezolano a pone mayoria di e accionnan di Citgo Petroleum y Citgo Holding como garantia di prestamo a base di bono cu nan a haci. E falta di cumplimento cu pago di interes y capital den varios caso ta haci cu e esunnan cu ta presta lo por pasa pa pone embargo riba e propiedad, den forma di e mayoria di e accionnan, riba cual nan por eherce derecho, si corte permiti esey.

Tur esaki ta mustra riba un panorama bastante grave pa PDVSA, unda su mero existencia ta na peligro. No cu gobernantenan Venezolano no a tene cuenta cu esaki. Asina na februari 2016 nan a lanta un compania militar di maneho di gas y petroleo, y di otro tipo di mineria, yama CAMIMPEG (Compania Anonimo Militar di Industria Minero, Petrolifero y di Gas), cu por eherce tur tarea y responsabilidad cu actualmente PDVSA tin. Esaki riba su mes no lo resolve e problema pa Venezuela, pasobra e casonan hudicial den exterior lo ta contra e sucesor legal di PDVSA, motibo pa cual talbes den e situacion actual no tin tanto sentido pa e medida aki.

Pa Aruba esaki finalmente por crea un situacion nobo, dependiendo kico lo pasa den corte. Un embargo riba e mayoria di shares di Citgo na Merca, y sigur un perdida di e propiedad definitivo pa PDVSA, lo por tin consecuencia pa e colaboracion cu Citgo ta duna den e proyecto di rehabilitacion. Di otro banda, e subsidiario na Aruba, y su compania madre na Merca, Citgo Aruba Holding LLC, no tin laso huridico cu Citgo Petroleum, pero ta subsidiario di PDVSA, motibo pa por lo pronto nada di capital pasa via e compania aki pa yega na man di PDVSA y, su tras gobierno di Venezuela.

Di e manera aki nos ta mira un taray ta cerando riba PDVSA, sin cu ta parce di tin un salida viabel. Manera nos a yega di indica anteriormente, tur e factornan cu por ta contra e compania y e gobierno su tras, na e momento aki ta bin hunto pa acelera e caida di e empresa. No ta pornada Nicolas Maduro a adelanta eleccion pa otro siman.