Pelea di gay of gayero ta un actividad cu ta tumando luga historicamente for di cu Spaño a haci su presencia na Aruba. Pero poco poco e tradicion aki a cuminsa mengua. Sigur e mentalidad di e generacion nobo y e tendencia mundial nobo pro defensa y derecho di animal tin su impacto riba cayehero.

Mario Arends conoci como “Mayon” kende ta un amante di historia local ta autor di e buki Pelea di Gai na Aruba, cu ta referi na historia, tradicion,cultura y te hasta tin hende ta defini como un deporte, e actividad aki.

For di 2006 el a cuminsa compila y traha riba tur sorto di informacion historico, etnico, cultura y tradicional pa duna bida na e buki interesante aki cu a keda publica aña pasa. E intencion tras di esaki ta pa kibra e taboe cu pa aña a yega di existi contra gayero, ya cu gayero ta parti di nos historia tambe. Basicamente esaki tabata e motibo cu el a skirbi e buki aki. “Historia pa mi no ta un cos cu ta bay mata niun hende.”

Historia y tradicion
E ta rescata e balor historico di e tradicion di gayero. Pero Mayon por ripara tambe cu un parti di e cultura di Aruba ‘kisas cu nan no kier acepta,’ e actividad aki. Tambe e ta referi cu deramento di gay a bin di e mesun tempo y movemento nobo a lanta pa defende derecho di animal, ya sea contra deramento di gay di berdad y pelea di gay.

Den su buki Mayon ta purba di splica cu gayero tambe a conoce cambio y a wordo ahusta na e epoca di awendia. E tabata miembro di diferente organisacion mundial di gayero, y por ehemplo na Santo Domingo e actividad aki ta legal, pero cu control. Cada pelea di gay tin tres persona cu funcion specifico: Un ta encarga di colecta e placa, e di dos ta representa e gobierno y e di tres ta representa un instancia cu ta atende cu e huerfanonan. Un 10% di tur entrada ta bay dedica na e institutonan cu ta percura pa e bienestar y cuido di e muchanan huerfano of riba caya.

Na Martinique y Guadalupe tambe el a wak un caso similar di tres miembro: gayero, representante di gobierno y e di tres tabata un representante di animal right. Na e islanan aki gayeronan a yega na un acuerdo preto riba blanco. Entre otro e gremio di gayero a bay di acuerdo pa baha e tempo di pelea. Tambe nan a prohibi uzo di caray cu ta e turtuga su casca, y e grandura di spoor ta mas chikito. Un representante di animal right ta controla e cumplimento di dje, y ta haya un participacion financiero.

Te hasta un biaha tempo cu Mayon a cuminsa skirbi e buki, el a invita un miembro di Animal Right Aruba (ARA) pa husga e actividad aki. Mirando e ehempel na Sto. Domingo, Martinique, Guadalupe y otro paisnan cu a introduci reglanan pa percura menos daño posibel na e gay y mantene bibo e tradicion. Esaki no ta motibo segun e autor- pa bo bisa cu e ta bon. E no sa si e tradicion di gayero lo keda existi pa semper. Pero si e kier bisa cu tin hopi atencion mas di loke e hendenan por pensa. Cu tempo e ta kere cu actividad di gayero lo keda existi, pero lo bin mas regla pa evita mas daño riba e gaynan durante e pelea.

E ta consciente cu mentalidad ta cambia, pero e ta haya cu hende mester keda hende y mester ‘compronde un cos y no core bira emocional.’ Ya cu un actividad asina, mester wordo analisa y compronde den su contexto historico cultural. Si nos compara gayero tempo di antes cu esunnan di awor, nan ta diferente.