Ayera merdia prensa a ricibi e tristo noticia cu e reconocido periodista, fotografo y colega di prensa Hubert Tiel a bay sosega. Apenas algun luna atras Hubert a ser diagnostica cu cancer avansa y ayera el a perde su bataya.

Den luna di september Bon Dia Aruba a publica un entrevista den cual Hubert a conta di su trayectoria extenso como fotografo, celebrando e aña aki 55 aña den e mundo di fotografia.

Na bida Hubert tabata reconoci den comunidad como fotografo y tabata presenta na diferente actividad semper cla pa saca e potretnan perfecto. El combina su pasion pa fotografia cu su otro pasion, motorsport, y tabata asisti na tur evento di careda di auto y motorsport.

E aña aki Hubert a cumpli 55 aña den e mundo di fotografia. Dia18 di augustus, dia di su cumpleaño, su pasion pa fotografia a cuminsa na momento cu pa su di 11 cumpleaño su mama a regal’e un camara chikito. E tempo ey tabata, segun el a conta, e camara tabata di rol di 12 y tabata saca potret blanco cu preto. El a conta cu e idea tabata pa e saca potret di e muchanan di bario cu a bin pa canta ‘happy birthday’ p’e, pero el a cuminsa saca potret di cosnan, manera cadushi, lagadishi, cosnan cu tabata move y asina poco poco su habilidadnan pa saca potret a progresa. “Como fotografo bo sa kico bo ta buscando, kico ta e angulo, kico ta bo limite, y bo ta buscando algo cu no ta mescos cu tur hende,” el a expresa un tempo atras durante un entrevista cu Bon Dia Aruba.

Cu e 55 aña aki den e mundo di fotografia, Hubert a colecta un archivo hopi grandi di potret, historia y recuerdonan warda. Algun luna atras el a haci entrega di tur su material na Archivo Nacional Aruba, potret, documento y hasta su camaranan. “Mi a hiba tur mi camaranan na ANA, tur mi badges, practicamente tur mi historia di 55 aña pa nan archiva esaki pa asina tambe nan por mustra hubentud con fotografia tabata y con leu el a yega awe,” el a indica.

E tempo aki, Sr. Tiel su mensahe pa hobennan cu ta desea di drenta fotografia tabata “nos ta saca potret di tur loke ta bin y tur loke ta bay. Pero mi conseho ta keda semper busca e angulo corecto, luz corecto, y posicion corecto. Wak e como arte, e mester keda semper un arte y lo keda den historia.”

E conocemento, historia y legado sumamente valioso cu Hubert ta laga atras lo compaña nos y brinda aliento, conseho y inspiracion pa e generacionnan cu ta bini despues di nos.

Bon Dia Aruba ta manda palabra di profundo condolencia pa famia, amistad y tambe demas coleganan di prensa. Cu Hubert descansa na paz.