Ayera tardi mediante un comunicado di prensa, Cuerpo Policial a informa di un suceso hopi alarmante, den cual un persona a tuma su bida.
“Diahuebs 1 januari 2026 pa mas o menos 7:40 di mainta durante un control den celnan na warda di polis Santa Cruz ta topa cu un detenido masculino cu lo a pone fin na su bida,” Cuerpo Policial a bisa den e comunicado. “Di biaha ta informa chef van dienst y na su turno ta pone central di polis na altura.”
Segun e comunicado, Central di Polis na su turno ta informa tur instancianan concerni na altura.
Dokter forensico, polis tecnico y Landsrecherche a presenta pa asina haci nan investigacion.
Departamento di Slachtofferhulp a presenta tambe pa asina guia e famia den e momento lamentabel aki.
Tocante identidad di e fayecido, a informa cu e detenido ta un hende homber nacionalidad Colombiano y tabatin 45 aña.
Riba rednan social Comunidad local a expresa preocupacion, mirando cu no ta prome biaha cu algo asina ta sucede na warda di polis. “Den cual condicion e celnan ta, pasobra no ta e prome biaha cu esaki ta pasa,” un usuario di Facebook a cuestiona.
Cuerpo Policial no a comparti mas detaye di e sucedido.
Cuerpo Policial y Bon Dia Aruba ta manda palabra di condolencia na famia di e fayecido.
