(AFP) – E unico sobreviviente di un crash di helicopter den sur di Peru cu a mata 15 persona tabata un cacho chikito cu tabata pertenece na un coronel cu tabata entre e pasaheronan, un fuente di forsa aereo a bisa AAFP ayera.
Trahadornan di rescate a haya e cacho, color caramel, entre e restonan di e helicopter Mi-17 cu a crash diadomingo. E tabata drumi banda di curpa di su doño, coronel Javier Nole, 50, kende tabata abordo cu su esposa y dos yiu muhe.
“E ta mascota di coronel Nole; e ta e unico sobreviviente,” e fuente, kende a solicita anonimato, a bisa AFP.
Medionan local a reporta cu e cacho ta mustra OK, pero como precaucion a ser hiba na un clinica veterinario.
Siete mucha tabata entre e 15 fatalidad na momento cu e helicopter fabrica na Rusia a crash den region Arequipa. E helicopter recientemente a keda desplega den operacionnan di rescate pa victima di inundacion eynan.
El a sali di ciudad di Pisco, den region Ica. Rescatistanan a localisa e sitio di e accidente dialuna tiki mas cu 300 meter leu cerca di Chala Viejo, un pueblo cerca di costa Pacifico na Arequipa.
Forsa aereo a lansa un investigacion pa determina e causa di e accidente.
