Fiscalia di Peru a pidi diahuebs pasa 36 luna di prizon preventivo contra e ex-alcalde di iskierda di Lima, Susana Villarán, ken ta investiga pa ricibi presuntamente 3 miyon di dollar di Odebrecht pa su campaña di ‘NO’ durante e proceso di revocacion cu a ser presenta den su contra na 2013.
E solicitud a ser presenta pa e fiscal di e ekipo special di Lava Jato, Carlos Puma, kende a pidi pa cambia e medida di restriccion pa impedi su salida y comparecencia, cu Villarán tabata mantene desde 2017, pa e 36 luna di prizon preventivo.
E pedido di fiscal a yega despues cu na april pas, e ex-superintendente di Odebrecht na Peru, Jorge Barata, a ratifica cu a apoya Villarán cu 3 miyon di dollar pa e campaña di ‘NO’ pa e revocacion, ora el a ser interoga pa fiscal Peruano como parti di un acuerdo di colaboracion eficaz cu Odebrecht.
Segun e testimonio di Barata, cu a ser cita pa medionan local, el a señala cu e aporte di Odebrecht pa apoya e continuidad di Villarán pa alcaldia di Lima a ser negocia y tramita pa e ex-gerente municipal José Miguel Castro.
E empresario Brasilero a agrega cu e mesun Villarán a yam’e pa duna gradicimento di e aporte di e constructor pa su causa.
Despues cu e declaracionnan aki a ser conoci, Villarán a nenga riba rednan social di a comete delito y a señala cu tur e tempo aki, ‘rigurosamente a cumpli cu e medida di restriccion’cu a ser imponi p’e y el a ‘asisti pa tur citacion’.
Den e linea ey, el a sigura cu lo sigui cumpli cu e diligencia, pa motibo cu e ta kere ‘den un husticia husto y imparcial y pronto, aleha di e espectaculo mediatico’.
