(Reuters) – Presidente Peruano, Dina Boluarte lo redobla su salario na e ekivalente di alrededor di 10 mil dollar pa luna, rabiando hopi Peruano cu a bisa cu lo por a gasta e placa miho pa alivia pobresa.
Minister di Economia a anuncia diaranson atardi cu e salario di Boluarte – kende su cualificacion di aprobacion ta entre esun mas abao di cualkier lider mundialmente – a ser aumenta na 35.568 soles ($10.067), mas o menos 30 biaha mas halto cu e salario minimo di Peru.
E salario di e presidente anteriormente tabata fiha na 15.600 soles ($4.400), un nivel introduci na 2006 ora cu ex presidente Alan Garcia a baha esaki di 42.000 soles.
E minister a bisa cu e aumento di salario a ser aproba caba pa e gabinete y mester drenta na vigor mesora. E gobierno a hustifica e aumento bisando cu compara cu 12 contraparte den henter Latino America, su pago anterior a keda na di 11 luga, riba solamente esun di e presidente Boliviano.
Un evaluacion di Rio Times aña pasa a mustra cu e salarionan di presidentenan Latino Americano ta varia entre $3.000 y $22.000, cu un promedio di alrededor di $9.600.
Sinembargo, e Peruanonan no ta impresiona.
“E ta un chiste,” e pensionado Rolando Fonseca a bisa pafor di un stand di corant den e capital Lima. “Tin pobresa extremo tur caminda na Peru y e mandatario mester duna un ehempel.”
E economia di Peru a recupera durante e ultimo dos aña, despues di un recesion provoca pa protestanan anti-gobierno na comienso di periodo di Boluarte. Sinembargo, e tasanan di pobresa, cu a empeora durante e pandemia di COVID-19, ta keda cerca di 30%.
Boluarte ta cla pa caba su periodo na juli 2026, despues di eleccion presidencial programa pa april proximo.
“E ta cerca di bay y no tin mester pa e aumenta su salario, e mester ta yudando hospitalnan y muchanan malo,” Carmen Juarez, un ama di cas di Lima a bisa.
Boluarte a yega na poder na fin di 2022 despues cu su predecesor Pedro Castillo a ser retira y aresta despues di a purba di disolve congreso. Su cualificacion di aprobacion ta alrededor di 2% pa 4%, segun encuestanan recien di Datum y Ipsos Peru.
El a enfrenta acusacion di corupcion, incluyendo acusacion di enrikecemento ilicito cu ta envolvi holoshinan Rolex. Tambe el a ser investiga riba su rol den supervisa e reaccion di polis y militar riba e protestanan anti-gobierno, den cua mas cu 50 hende a muri.
Boluarte, di 63 aña, ta nenga cu a haci algo fout.
Esfuersonan ripiti pa destitui Boluarte a ser stroba pa partidonan politico conservativo cu ta sosten’e. Peru tabatin seis presidente desde 2018, y tres ta actualmente ta cera.
Legislador di oposicion Jaime Quito a bisa cu e tin planea pa promove un iniciativa den Congreso pa anula e aumento di salario. “Esaki ta un burla pa un pais cu ta confrontando problemanan asina serio”, el a bisa.
