Diasabra atardi, un grupo basta grandi a presenta na gobierno cu mas di 8000 firma entrega cu peticion pa aumenta e castigo pa esnan cu comete Hit & Run. Den ultimo añanan por a nota cu e cantidad di Hit & Run ta bin ta aumentando.

Segun e organisadornan di e peticion, no por ta asina cu chauffeurnan iresponsabel ta sigui cobra bida di hendenan inocente y nan mes ta keda casi sin castigo. Chauffeur mester compronde cu un auto ta manera un arma cu por haci hopi daño y hasta causa morto.

Manera Bon Dia Aruba a reporta e luna aki, un di e sucesonan mas tragico y impactante a sucede durante e prome siman di 2026, na momento cu un pareha a perde nan bida den un hit & run diadomingo 4 di januari riba L.G. Smith Boulevard.

E caso aki, den cual e sospechoso C. Fernandes, coriendo den un auto SUV color preto na un velocidad extremadamente halto, a trapa un pareha y core bay sin stop, lagando nan atras, a causa un conmocion enorme. No solamente pa e manera horibel den cual e pareha a perde nan bida mientras nan tabata crusa riba zebrapad, sino pa e hecho cu e chauffeur, cu segun medionan local tabata core bao influencia, a bandona e sitio sin ni sikiera stop un rato pa mira kico el a causa.

Na e sitio, dokter forensico a constata morto di e pareha: Josely Paulina Vasquez Gonzalez naci riba 09-07-1960 na Republica Dominicana y Carlos David Vialez Valerio naci riba 19-10-1971 na Republica Dominicana, prome y di dos morto den trafico pa aña 2026.

E hecho cu e chauffeur a bandona e sitio despues di e accident a causa indignacion y tristesa adicional.

Riba rednan social, Edwin Willems – yiu di e victima y un di e organisadornan di e iniciativa pa bin cu castigo mas halto pa casonan di Hit & Run – a haci un yamado pa pueblo uni pa busca husticia “no solamente pa mi mama y su casa, sino pa tur victimanan y famianan cu a pasa locual nos ta pasando.” Hunto cu su post, el a inclui un cantidad di caso di morto den trafico, mustrando cu hopi biaha, consumo di alcohol y coremento bao influencia ta involucra, y alabes, cu hopi biaha e castigo cu ta duna na e chauffeur cu tabata core bao influencia ta demasiado abao.

Esaki a cuminsa un combersacion entre usuarionan riba un tema cu ta birando un urgencia na nivel nacional y cu mester haya atencion debido.

“Tristo cu no tin castigo drechi na Aruba,” S.T. a comenta. “Hit and run ta mescos cu intento di asesinato. Y si e victima fayece e ta conta mescos cu asesinato. Mester baha man pisa riba e casonan aki.” El a haci alabes algun sugerencia di e castigonan cu lo considera adecuado pa e crimennan aki. “Si haya hende ta core bebi, boet nan y kita nan rijbewijs pa minimo 6 luna. Exigi nan test cu nan ta limpi di alcohol/droga prome nan hay’e back. Door di e castigonan ridiculo cu tin aki, hende ta sigui haci y deshaci den trafico.”

Patronchi persistente den trafico


 Durante ultimo cinco aña, cifranan di fatalidad den trafico a varia, pero e causanan subyacente tras di accidente mortal a mustra un continuidad notable. Datonan di Ministerio Publico (OM) y reportahenan den medionan local ta punta ripitidamente riba coremento bao influencia y comportamento di hit & run como problemanan persistente y sin resolve riba camindanan di nos isla.

Durante periodo di cinco aña di 2021 te 2025, Aruba a registra mas di 50 fatalidad den trafico, cu casonan di coremento bao influencia aumentando notablemente entre 2021 y 2023, y comportamento di hit and run ripitidamente presente den datonan oficial y reportahe di suceso.

Loke ta resalta ta no solamente e cantidad di morto, sino e consistencia di e factornan di riesgo. Coremento bao influencia di alcohol a keda prevalente a pesar di accionnan di polis, mientras e disponibilidad di e chauffeurnan pa bandona escena di accidente ta punta riba un problema mas profundo di evasion di responsabilidad y disuasion.

Pa legisladornan y agentenan di ley, e ultimo cinco aña ta sugeri cu morto den trafico na Aruba ta resultado di patronchinan di comportamento cu a proba di ta resistente pa intervencionnan a corto plaso. Pa e motibo aki, comunidad ta exigiendo un cambio urgente den procesamento, enhuiciamento y castigo di e casonan aki.