(Infobae) – Presidente di Colombia Gustavo Petro a denuncia e existencia di codicia internacional pa e recursonan di Venezuela y a rechasa acusacionnan contra di dje tocante su maneho di e situacion den e pais bisiña y posibel vinculonan cu trafico di droga.

Den un mensahe publica riba su cuenta oficial di X, anteriormente conoci como Twitter, e mandatario a skirbi cu “e spada di Bolívar nunca no tabata mancha cu cocaina” y a reafirma cu poder ta di e pueblo.

Den e publicacion, Presidente Petro a adverti di e riesgo cu Colombia y Venezuela por ser atrae den un estado di conflicto similar na esun di Siria debi na interes externo den e recursonan no-renobabel di e region.

“Esaki ta e realidad di Venezuela: su rikesa den recursonan no renobabel. Nan por converti nos, Colombia y Venezuela, den un otro Siria pasobra tur loke nan ta preocupa cune ta codicia,” Gustavo Petro a declara.

E hefe di estado tambe a atende acusacionnan di sectornan cu e ta busca pa “mantene un dictadura na Venezuela of comparti den e ganashi di traficantenan di droga.”

Como contesta, Petro a nenga e acusacionnan y a declara: “No, cabayeronan, e spada di Bolívar nunca no tabata mancha cu cocaina. Poder no ta di nos; e ta di e pueblo, y e tempo di e pueblo a yega den henter America.”

E declaracion di e presidente Colombiano ta parce di ta un contesta na un articulo di Armando cu ta pretende cu e santo preto di sur di Venezuela, rico na coltan, supuestamente ta ser horta pa guerilleronan y mafianan cu ta opera na Colombia y Amazonia.

Den su discurso na CELAC, Presidente Petro a indica cu “esaki no ta tocante e presidente di Venezuela; e ta tocante e pueblo ruman di Venezuela… Nos lo no ta traidor di nos paisnan ruman.”

Gustavo Petro a critica severamente ex-presidente Colombiano Iván Duque despues di e declaracionnan di Duque encuanto e postura di presidente Brasilero Luiz Inácio Lula da Silva riba e situacion na Venezuela bou gobierno di Nicolas Maduro. E palabranan di Petro, publica riba su cuenta oficial di X, anteriormente Twitter, a traha un liña cla entre su trayectoria politico y esun di su predecesor.

Den su contesta, Petro a defende su posicion contra dictaduranan na Latino America y a recorda su experiencia personal durante periodonan di violencia politico na Colombia. Tambe el a responde na e caracterisacion di Duque di esnan cu no ta condena Maduro directamente como “complice.” E mandatario Colombiano a enfatisa: “Bo ta kere cu bringa un dictadura kiermen invadi un pais.”

Petro a declara cu su lucha contra dictaduranan a ser hiba for di den Colombia, afirmando cu el a wanta e era di “estadonan di asedio, e Frente Nacional, y e gobernacion paramilitar di cual bo ta e heredero, sin nunca boga pa un invasion.” El a aclaria cu e no ta sostene intervencion militar den otro estadonan y a señala cu e idea di invadi nacionnan bisiña ta contradeci su principionan y experiencia: “Miles di mi compañeronan politico a ser asesina, y mi a ser tortura, mescos cu miles di otro hende.”

El a insisti cu ta pueblo so por transforma regimennan autoritario for di paden y a sostene: “Solamente pueblo ta derota dictaduranan; reemplasando un dictadura pa un pio pa medio di intervencion stranhero no ta un solucion.” Petro a adverti su predecesor, “Nunca spera cu nos lo haci daño na un otro nacion ruman.” Cu un tono critico, el a conclui: “E pueblo no ta e dictador, pero ta parce cu bo ta disfruta di ataca e pueblo; aparentemente, bo ta contento di mira e sanger di hobennan basha riba caya.”