(AP) – Pfizer ta bisa cu nan tin den plan pa reuni cu e oficialnan di salud na Merca, pa asina papia tocante e trahado di medicamento su peticion pa autorisa un tercer dosis di su vacuna contra COVID-19, den bisa cu president Joe Biden su consehero medico a admiti cu e ta “enteramente posibel, y hopi probabel” cu dosisnan extra pa yuda e vacuna lo ser necesita.

E compania a declara cu nan tin den agenda pa tin e reunion aki cu e Food and Drug Administration y algun otro oficialnan riba dialuna, dianan despues cu Pfizer a aserta cu e tercer dosis aki lo ser necesita dentro di 12 luna.

Pfizer su Dr. Mikael Dolsten a conta The Associated PRess siman pasa cu algun datonan ricibi di e investigacion haci pa e compania tocante e dosis aki ta mustra di yuda e nivelnan di anti-curpa duna pa e vacuna aumenta den 5 pa 10 nivel, despues di e dos dosis nan, compara cu nan di dos dosis lansa algun lunanan anterior. Evidencia cual e compania ta considera ta marca e necesidad di un tercer dosis.

Riba diadomingo, Dr. Anthony Fauci no a descarta e posibilidad, pero si a comenta cu ta hopi trempan pa por decidi esey, y laga e Gobierno recomenda otro dosis. Fauci a conta cu Centers for Disease Control and Prevention y Food and Drug Administration a haci lo corecto siman pasa di pusha bek contra Pfizer su certesa pa cu nan declaracion bisando cu nan no ta mira e necesidad di un tercer dosis “na e momentonan aki.”

Fauci a bisa cu investigacionnan clinico y datonan di laboratorio te ainda tin cu comproba e necesidad completo di un tercer dosis pa yuda e dos dosisnan existente caba di Pfizer y Moderna of e un dosis di Johnson & Johnson su regimen.

“Aworaki, cu e datonan cu nos a ricibi y e informacion obteni, nos no tin mester di duna e pueblo un di tres dosis” El a comenta. “Esaki no kiermen cu nos ta stop aki, tin investigacionnan cu ta ser haci y ta tumando luga aworaki mientras cu nos ta papia tocante e posibilidad di si nos mester haci esaki y den ki tempo, lo nos mester cuminsa haci esaki.”

El a bisa cu e ta bastante posibel cu den e lunanan venidero, mientras cu e datonan ta desaroya, e Gobierno lo urgi un tercer dosis basa na e factornan manera edad, y condicionnan medico ya existente den cierto persona. “Claramente e dosis aki ta enteramente posibel, probablemente nos lo yega un punto, unda cu nos lo tin mester di un tercer dosis.” Fauci a culmina.

E reunion di dialuna entre Pfizer y oficialnan di salud di Merca a ser reporta prome pa The Washington Post.

Actualmente, solamente mas o menos 48% di e populacion di Merca ta completamente vacuna. Algun parti di e pais tin porcentahenan hopi baho di vacunacion, y den e partinan aki e variante Delta ta causando mas dano. Siman pasa Dr. Rochelle Walensky, director di Centers for Disease Control and Prevention a bisa cu nos ta yegando na dos banda di e moneda, algun parti di e pais ta grandemente inmunisa y bolbiendo normalidad, mientras cu otro partinan tin aumento den hospitalisacion.

Fauci a revela cu e ta inexplicabel con algun Mericano ta resisti asina hopi na e vacuna, mirando cu datonan comproba cientificamente ta demostra con efectivo e ta pa cu infeccion di COVID-19 y hospitalisacionnan, y cu e ta hopi consterni pa e esfuersonan haci pa blokia e intento di haci e vacunacion hopi mas accesibel, manera Joe Biden su idea di hiba e vacuna porta pa porta.

Gobernador Asa Hutchinson, R-Ark, a bay di acuerdo riba diadomingo cu tin un resistencia na e vacuna den areanan chikito den estadonan pa motibo cu “bo ta encontra cu e personanan conservativo, cu ta hopi dudoso di e Gobierno.”

Describiendo su esfuersonan pa por aumenta vacunacion den su estado, cual ta mirando aumento den infeccionnan, Hutchinson a declara “niun hende no kier un agente tocando na su porta, sinembargo, nos kier pa esunnan cu no tin acceso na e vacuna di otro manera, sa di e vacuna y tin e oportunidad di ricibi esaki.”

E componente ‘grassroots’ di e campanja di vacunacion federal tin desde april den operacion, ora cu e cantidad di vacunanan disponibel tabata menos cu e demanda. Esaki a ser traha y funda pa e Congreso den e peticion di 1.9 triyon dollar pa ayudo di COVID-19 den maart, y cu hopi abrumacion ta ser poni den practica pa e oficialnan local di salud, trahadonan di sector priva y voluntarionan.

Rep. Adam Kinzinger, R-I11, a demostra oposicion na e intento di algun legislado GOP di vacunacion, bisando e ta “locura absoluto.” El a bisa cu Kevin McCarthy ken ta lider den House Republican di California y otronan den e partido tin cu papia y bay contra di “e politiconan payaso cu ta hungando cu e miedo di vacuna pa nan ganancia propio.”

Fauci a haci un aparicion riba CNN su “State of the Union”, ABC’s “This Week” y CBS “Face The Nation. Hutchinson a aparece na ABC, y Kinzinger tabata riba CNN.