ORANEJSTAD – Fundacion pa Hende Muhe den Dificultad (FHMD) cu hopi añanan ta luchando contra Violencia Domestico, ta agradecido cu e compromiso di PG van Dam y Ministerio Publico.

Ta asina cu siman pasa PG van Dam a firma un Instruccion nobo pa ora tin casonan di violencia den relacion, FHMD ta elogia PG pa esaki.

Ainda nos ta corda con tres aña pasa Fundacion pa Hende Muhe den Dificultad (FHMD), representa pa su coordinador y su voorzitter, Magaly Maduro y Suzette Kock respectivamente, a haci un bishita di cortesia cerca procurador general sr. van Dam. E tawata un combersacion ameno y nos a ripara cu e tema di Violencia Domestico tawata algo cu tawata biba fuerte cerca e PG aki.

For di e combersacion a sali dos promesa. Cu e kier bin cu un ‘veiligheidshuis’ den cual lo purba di atende mas hopi hoben y famianan cu risico di violencia of crimen prome cu awa pasa hariña, y cu e lo traha riba un ‘richtlijn/aanwijzing’ pa cu Violencia Domestico.

FHMD tawata impresiona cu sr. van Dam a durf di haci promesanan cu no ta solamente depende riba dje pa realisa.

E instruccion aki ta contene reglanan pa investigacion y persecucion ora di violencia relacional. Tambe e ta encera e condicionnan basico pa loke ta trata e cooperacion entre polis, Ministerio Publico, Reclassering y otro partnernan den e sector social y di cuido, cual nan ta traha hunto den e ‘Veiligheidshuis’.

Meta tras di e instruccion aki ta pa crea un miho aporte na trabao mas efectivo y eficiente di tur e partnernan concerni, como reaccion riba violencia relacional.
Ademas e Instruccion ta sirbi como herment pa miho reconoce violencia den relacion, pa stop violencia of stop cu e menasa di violencia, y garantisa siguridad di victimanan.

P’esey Fundacion ta sumamente agradecido na sr. van Dam cu e no a lubida su compromiso, no solamente cu Fundacion, pero cu tur victima di Violencia Domestico. No tin palabra suficiente pa gradici e iniciativa aki di parti di Ministerio Publico y di PG van Dam cu ta demostra nan motivacion pa e ehecucion di e instruccion aki.

Un biaha mas, masha danki sr. van Dam. You are a man of your Word!