Piscadonan a haya boto cu varios cadaver na Brazil

(AP) – Diasabra ultimo piscadonan a haya un boto chikito di palo yen di cadavernan den un estado di descomposicion avansa dilanti di e costa noreste di Brazil, segun medionan local a informa.

Fiscalia di Brazil den un comunicado a indica cu a manda un grupo forensico na e area pa determina di na unda e boto cu e cadavernan a bin.

“Algun rapport ta señala cu por tin hasta 20 cadaver,” e comunicado di Fiscalia a detaya y tambe a anuncia cu a habri un investigacion penal y civil pa e caso aki.

No ta prome biaha cu piscadonan ta descubri botonan cu cadaver na banda di ocean Atlantico. Na 2021, por lo menos 7 boto yen di cadaver a ser lastra pa lama na Brasil y pa e Caribe Oriental.

Investigacionnan di autoridadnan local ta determina cu den algun caso e botonan aki ta transporta migrantenan Africano cu ta purba yega na islanan Canarias, segun den caso aki nan no a logra yega y nan a keda durante varios siman na ocean Atlantico.

Ademas, e corant O Liberal, a publica e conclusion preliminar di un comisario di polis local, ken a bisa cu tabatin cerca di 20 curpa den estado di descomposicion avansa y nan ta sospecha cu por trata di “refugiadonan di Haiti,” un pais cu ta bibando un crisis politico, social y economico severo.

Sinembargo, un ekipo di Polis Federal cu ta inclui miembronan di Districto Federal di Brasilia, a yega te e luga “pa descubri ken ta e personanan cu tabata den e boto aki” mediante protocolnan di identificacion di victimanan di desaster, nan a amplia e radio di e posibel origen di e boto hasta continente Africano, na unda e conflictonan arma cu ta desaroya na varios pais a provoca un exodo migratorio pa Europa.

“Te ainda nos no sa e cantidad, nacionalidad, ni e causa di e morto di e victimanan,” e corporacion a señala den un comunicado.

E boto a ser haya na un region conoci como Salgado, na noreste di Para, na unda tin varios reserva protegi y principalmente tin comunidadnan tradicional cu ta biba di piscamento, actividadnan artesanal y captura di cangreu.

Polis Federal Brasileño a manifesta cu nan ta investiga e caso “den colaboracion cu varios organismonan di seguridad publico” di Para, cu tambe a respalda loke O Liberal a publica indicando cu e victimanan por a fayece como consecuencia di un naufragio.