E plan di rescate financiero te ainda no ta conoci publicamente, pero gobierno ta basta adelanta cu esaki.
Prome minister, Evelyn Wever-Croes a yega di expresa durante un conferencia di prensa (15 februari ultimo), cu nan ta kedando cla cu e draft, pero nan tin cu delibera cu Caft pa mira si e instancia di supervision financiero aki, ta di acuerdo cu e skema economico-financiero cu nan a pone den dje. Nan ta spera cu Caft por acepta e plan aki y tambe cuanto tempo e instancia aki por duna gobierno pa bin cu un presupuesto balansa.
Nan a scoge pa un cuadro hopi conservativo pa e ehempel un crecemento economico modera di 1% so. Aunke nan ta bay traha pa e ta mas halto, ya cu ora tin desaroyo economico halto e deficit ta bira mas chikito. E cifra di 1% ta basa ariba proyectonan cu ta andando aworaki pero excluyendo refineria.
Esaki ta pone cu nan no por hisa entrada hopi pa e aña aki, pasobra nan no por tene cuenta cu un desaroyo economico grandi. Consecuentemente nan mester baha nan gastonan mas. Un punto cu Bon Dia Aruba a trece cerca e mandatario, tin di haber cu e bahamento di gasto den personal di aparato gubernamental. El a bisa cu esaki ta un tema cu nan a yega di trata cu Caft tambe, y te hasta IMF a yega di haci gobierno e mesun pregunta durante nan bishita ultimo na Aruba.
Segun e mandatario Wever-Croes, nan por a bin cu historia bunita manera e gobierno anterior y keda sin cumpli cu nan. Pero nan a prefera di mustra e realidad manera cu e ta. E realidad -segun prome minister- ta cu ‘den gasto di personal no tin demasiado espacio pa bo baha’.
E ta haya cu e kitamento di cantidad di ambtenaar no ta un decision cu ta responsabel ni apropia den e momento aki tampoco. Pero si nan tin cu percura pa hisa eficiencia. Ya cu e critica den aparato gubernamental ta no tanto e gastonan so, sino cu e percepcion cu e ta un gasto halto y e no ta productivo.
