Plan nacional pa reduci cantidad di persona sin cas no ta ser implementa den mayoria di municipio

(NLTimes) – Mas cu 80% di e municipionan responsable na Hulanda no ta implementando e plan di gobierno pa reduci drasticamente e cantidad di persona sin cas door di duna nan un cas inmediatamente, segun un encuesta cu plataforma investigativo Pointer a haci entre e municipionan. Mitar di e municipionan cu a participa den e encuesta a describi e plan manera impractico y poco realista.

Gobierno Hulandes a presenta e Plan Nacional di Accion contra Falta di Cas na 2023. E punto principal di e plan ta e principio di “Housing First”, cu ta consisti di duna un persona sin cas un cas prome, en bes di pone prome den un refugio of shelter temporal. Segun gobierno, e metodo aki ya a mustra bon resultado na diferente pais, manera Merca y Finlandia. Ademas, e strategia tambe por reduci gastonan pa sociedad, pasobra e costo di refugionan temporal ta relativamente halto.

Pointer a investiga 44 municipio regional tocante nan implementacion di e plan. Di nan, 33 a confirma cu nan no ta aplicando e metodo di Housing First. Siete municipio a indica cu nan ta purba pone e sistema na practica, mientras cu cuatro no a completa e encuesta.

Despues di e escasez di casnan, 65% di e municipionan a indica cu e reto mas grandi ta cu hopi di e personanan sin cas tin problemanan compleho. Segun nan, hopi miembro di e grupo aki ta enfrenta combinacion di problema social, psicologico y medico cu ta rekeri mas cuido y asistencia cu loke inicialmente a ser calcula.

Ademas, 63% di e municipionan a expresa cu nan no ta haya suficiente apoyo di partnernan local ni di comunidad. Entre otro, algun residente ta preocupa cu e colocacion di personanan sin cas den nan bario por afecta e calidad di bida, mientras cu corporacionnan di vivienda ta expresa preocupacion tocante posible molester den bario y atraso den pago di huur.

Aunke 68% di e municipionan ta di acuerdo cu e concepto di Housing First ta un bon solucion riba papel, mitar di nan a cualifica e plan manera impractico, poco realista y dificil di realisa den practica.

Investigador riba falta di cas, Nienke Boesveldt, ta considera cu e problema principal ta cu gobierno a laga e municipio mes determina con nan lo implementa e politica. Segun e, algun municipio simplemente ta ignora e plan, pasobra cu e no ta obligatorio. El a agrega cu no implementa e metodo di Housing First no ta un decision sabi, ni for di punto di bista humano ni financiero.