meldcode abuso mucha (jo) (2).jpg

”Pa 20 di November mi kier presenta e Nacionale Meldcode y ofrece training pa cuidadonan di mucha, docentenan y diferente instancia y fundacionnan pa tur hende sa cua paso mester tuma y señala cu tin abuso di mucha ta tuma luga.”

 

Esaki minister di Asunto Social, Paul Croes ta bisa Bon Dia Aruba.

 

Ta asina cu den e Codigo Civil, e Centrale Meldpunt pa Aruba a wordo apunta siman pasa conforme cu un estudio di Unicef. Esaki ta un estudio cu Unicef a haci den 2013 riba e cuido di nos muchanan akinan na Aruba cual a exigi accion di nos gobernantenan y Parlamento riba e situacion di mucha y adolescente na Aruba.  E investigacion aki tambe a ser realisa den otro islanan di Caribe cu ta forma parti di Reino Hulandes.  Un di e puntonan mas importante cu a resalta den e rapport aki tabata seguramente e derecho riba proteccion indicando cu ta haci falta di un sistema di proteccion extenso di entre otro negligencia y abuso.

 

”Unicef a bin cu diferente recomendacion na con pa drecha e cadena di cuido y proteccion di muchanan. Un di esakinan tabata pa en todo caso wordo reenforsa cu personal pero tambe su posicion legal. Te cu siman pasa, e posicion huridico di Bureau Sostenemi no tabata regla ainda. A wordo proponi den e Codigo Civil, e Minister di Husticia hunto cu mi persona y tambe Minister di Salubridad pa apunta e instancia cu lo bira e meldpunt.”

 

Esaki tambe ta pa cumpli basicamente cu un mocion di Mei 2015 di parlamento unda cu 21 miembro a vota na fabor pa Bureau Sostenemi bira e Meldpunt Central pa Aruba. Pa locual ta e codigo, esaki segun Minister Croes ta e siguiente paso. ”Esaki sigur ta un paso pa mehora e situacion di derechonan di mucha na Aruba. E Nacionale Meldcode tabata un otro recomendacion di Unicef como tambe di diferente instancia na diferente paisnan. Tin un comision di derechonan di mucha akinan na Aruba cu mi mes a presidi un tempo den parlamento anto nan tambe ta trahando riba esaki y recomendando pa bini finalmente cu Meldcode.”

 

‘Fada cu mentira y promesa falso’

 

Fuera di ta conoci pa su arte di grafiti ‘Aruba Pro Pedofiel’ rond di Aruba,  su caso contra acusado Juancho Tromp a subraya un bes mas entre otro e fayo den sistema di registracion pa casonan di abuso di mucha na Aruba. Esaki ta un pelea cu hopi otro hende na Aruba tambe ta comparti pero segun Sr. Danies, ta parce cu Parlamento kier djis concentra riba ‘calma’ e caso di dje en particular y no echt pone enfasis na soluciona esaki den forma di ley pa e ora tur cos cana debidamente den general pa tur caso na Aruba. Sr. Reginald Danies ta bay bringa su caso den corte contra acusado Sr. Juancho Tromp dia 7 di october y ta splica Bon Dia cu e tin asina hopi tempo ta warda cu e ta cansa cu mentiranan y promesanan falso. ”Ora bo wak bon, tanto bal bo tin e cadena aki di instancianan pero na final no tin un ley. Mester tin un ley fiho unda e hendenan aki ta obliga pa traha pasobra tin un ley unda tur cos ta wordo registra den un computer na hues pa ora nan haya un caso e psycholoog lo tin contact directo cu hues pa determina exacto si ta maltrato of abuso etc.,” Sr. Danies ta bisa agregando cu na Aruba, hues no ta traha direct cu psycholoog anto esaki ta un punto hopi crucial ora ta determina castigo.

 

”Nan a ‘drecha’ net e cosnan cu ami a highlight den e documento cu mi a tira den parlamento dus mi ta pensa nan kier mane conforma cu mi y no e pueblo. E cos aki no ta pa mi so, e mester cana den un ley caminda hues lo tin contact direct cu psycholoog”, Sr. Danies ta splica Bon Dia agregando cu esaki ta e problema pakico casonan no ta cana debidamente pa castigonan apropia por wordo duna.

 

Sr. Danies ta splica Bon Dia cu el a ricibi cantidad di papel y documento cu e no tabata sa kico pa haci cu nan. E papelnan aki tabata ta entre otro copia di e amienda, manifiesto di Sra. Lisette Gomez y otro tipo di papelnan indicando e puntonan cu mester wordo cambia den e Kindermishandeling Meldpunt pa por yega na stabilisa e ley di mucha. El a dicidi di tira e papelnan aki den parlamento na momento cu Minister Paul Croes tabata na palabra como forma di protesta. ”Kico mi mester haci cu e papelnan aki? Mi gewoon no ta compronde.” Sr. Danies ta bisa. Sr. Danies ainda ta deteni pa algun dia mas relaciona cu menasa haci riba rednan social pa kima parlamento. Segun Ministerio Publico, a prolonga su detencion pa 8 dia mas te ora cu fiscal considera cu e lo tin cu keda den detencion y wordo hiba dilanti hues comisario kende lo tuma decision tocante con lo sigui cun’e.