E plan preliminar pa transformacion di turismo na Aruba ta propone un cambio den e modelo di turismo di crucero, pasando di un enfoke riba aumento den cantidad di pasahero pa uno cu ta tene cuenta cu capacidad y cu ta busca genera mas entrada economico pa cada pasahero.

E meta ta pa mantene e cantidad anual na aproximadamente un miyon pasahero te 2031, mientras e plan ta propone un limite preferi di 8.000 pasahero di crucero pa dia, un maximo absoluto di 10.000 y no mas cu un mega-barco di crucero riba e mesun dia. Alabes, e meta ta pa aumenta gasto promedio di cada pasahero for di $197 pa $250 pa 2031.

E medidanan ta inclui den Program 6, ‘Cruise Transformation, di Aruba Strategic Tourism Implementation Plan 2026–2031’. E documento ta un version preliminar y e parametronan operacional presenta ainda no ta permanentemente estableci pa ley of contrato. Nan ta funciona manera guia pa planificacion y programacion, cu mester ser valida y evalua anualmente.

E principio principal ta cu futuro resultado di turismo di crucero no mester ser midi solamente segun cantidad di pasahero of barco cu ta bishita Aruba. E plan ta busca aumenta e balor economico genera pa cada bishita, mientras ta tene cuenta cu trafico, uzo di beach, calidad di bida di residente y satisfaccion di pasahero.

Pa e motibo aki, e plan ta establece aproximadamente un miyon pasahero di crucero pa aña manera nivel di stabilisacion te 2031 y no manera un meta pa sigui crece. Ora ta prepara e calendario anual di barco, cantidad y tipo di barco mester ser maneha alrededor di e nivel aki, cu espacio pa adaptacion den caso di asunto relaciona cu seguridad of otro interupcion.

Riba nivel diario, e plan ta propone 8.000 pasahero programa pa baha for di barco como e limite preferi. Esaki ta e nivel cu normalmente mester ser uza pa planificacion di waf y negociacion cu companianan di crucero. E maximo absoluto ta 10.000 pasahero pa dia. Segun e documento, e cifra di 10.000 no ta un meta, sino un limite cu no mester ser pasa.

Si un dia tin entre 8.001 y 10.000 pasahero programa, e plan ta exigi cu tin capacidad comproba y medida pa controla e impacto adicional. Si e cantidad proyecta ta pasa 10.000, e bishita no mester ser aproba bao e modelo proponi.

Otro regla ta cu Aruba no mester ricibi mas cu un mega-barco di crucero riba e mesun dia. E propuesta ta indica cu Aruba Ports Authority (APA), mester mantene un registro cu clasificacion di barco basa, entre otro, riba capacidad certifica di pasahero y profiel operacional. Si un dia ya tin un mega-barco programa, un di dos mester ser move pa otro dia of ser reemplasa cu un barco mas chikito of cu ta genera mas balor local.

E intencion no ta solamente limita cantidad, sino aumenta e balor economico di cada pasahero. E punto di salida den e plan ta un gasto promedio di $197 pa 2031, e meta ta $250, un aumento di US$53 pa pasahero. Cu volumen anual manteni na aproximadamente un miyon, e modelo ta busca mehora resultado economico sin depende di aumento continuo den cantidad di bishitante.

Pa logra esaki, e plan ta pone enfasis riba tempo cu pasaheronan realmente por pasa riba tera. E meta ta cerca di ocho ora util riba tera, caminda itinerario di barco ta permiti esaki. E documento ta indica cu mester evita perde tempo innecesariamente na e terminal, den transporte of pa motibo di congestion causa pa diferente barco cu ta yega pareu.

E sistema proponi pa programa barco ta tene cuenta cu mas cu solamente capacidad di e waf. Prome cu aproba un bishita, mester considera si camindanan di Oranjestad, parada di taxi, espacio publico, sistema di awa sushi y atraccionnan por maneha e cantidad di persona cu ta yega pareu. Si esaki no ta posibel, opcionnan ta inclui asigna bishita na San Nicolas unda ta tecnicamente posibel, separa oranan di yegada of distribui pasaheronan na diferente actividad y orario.

Si capacidad di transporte of condicionnan di trafico no permiti cumpli cu e standardnan estableci, e plan ta contempla diferente medida, manera adapta ora di yegada, distribui excursionnan riba diferente orario, limita cantidad di pasahero pa e dia concerni of, como ultimo opcion, no acepta e bishita.

Un cambio importante ta relaciona cu manera pasaheronan di crucero ta ser distribui riba e isla. E plan ta conecta turismo di crucero cu capacidad di beach y atraccionnan, cu e intencion di evita cu gran cantidad di pasahero ta concentra na e mesun lugar durante un periodo cortico.

Den e propuesta, Palm Beach tin un posicion specifico. E plan ta indica cu uzo organisa di Palm Beach door di gruponan di crucero no lo ser permiti. E restriccion ta inclui excursion bendi door di compañia di crucero, transporte comercial pa beach, grupo organisa di taxi, bus di tour y reservacion di stoel of otro facilidad pa gruponan di crucero.

Esaki no ta nifica cu un pasahero individual di crucero no por bay Palm Beach. Segun e plan, pasaheronan individual ta mantene e mesun derecho di acceso publico cu otro persona. E restriccion ta enfoca riba actividad organisa y comercial cu ta hiba grupo di crucero pa Palm Beach.

Pa otro beachnan, e modelo ta varia segun capacidad y sensibilidad di cada lugar. Bushiri ta ser presenta manera e beach principal cu por ser prepara specificamente pa maneha bishitante di crucero, cu facilidad, lifeguard, servicio sanitario, transporte, negoshinan local y orario programa.

Na Eagle Beach, uzo relaciona cu crucero lo ser controla mediante asignacion adelanta, limite di tempo, punto defini pa baha y subi pasahero, limite pa stoel y otro mueble di beach, espacio reserva pa uzo publico y zona cu mester keda liber pa motibo ecologico. Na Arashi, e plan ta contempla solamente grupo chikito cu reserva adelanta, vehiculo di capacidad limita y periodo cortico, cu posibilidad pa reduci of suspende actividad durante weekend y dia di fiesta.

Pa Tres Trapi, e enfoke ta mas restrictivo. E plan ta propone prohibi transport organisa di pasahero di crucero pa beach y actividad di snorkel na gran escala. Si algun actividad guia ser permiti, esaki mester ta pa grupo masha chikito, cu guia certifica y regla estricto pa proteccion di bida marino.

E transformacion di turismo di crucero ta inclui tambe inversion den Oranjestad y San Nicolas. E plan ta propone cuminsa implementacion di Port City y renobacion di edificio di DOW na 2027. Pa 2028, e intencion ta cuminsa cu mehoracion di e facilidad pa barco na San Nicolas, como parti di e esfuerso pa distribui actividad turistico mas ampliamente y stimula desaroyo economico den otro parti di Aruba.

E plan ta contempla tambe cambio den e ‘head tax’ di crucero. Segun e kalender proponi, e tarifa ta subi di $15 pa $20 na 2028, keda na $20 te 2032 y subi na $25 na 2033. E entrada y gasto relaciona cu Program 6 mester ser administra separa for di e otro 11 programanan di Tourism 3.0.

APA ta identifica como e instancia principal responsabel pa ehecucion y financiamento di proyecto y facilidadnan portuario, Port City, renobacion di edificio di DOW, trabaonan na San Nicolas, operacion di terminal y programacion di waf. E futuro National Tourism Office lo coordina politica y distribucion di bishitante, mientras Aruba Tourism Authority lo enfoca, entre otro, riba mercadeo y posibilidad pa bishitantenan di crucero regresa despues como turista stay-over.

Cada temporada di crucero mester ser evalua y resultado mester ser incorpora den e kalender di e siguiente aña. E plan contempla ta analisa, entre otro, tipo di barco, cantidad di barco cu yega hunto, disponibilidad di transporte, capacidad di atraccion, condicion di tempo y calidad di producto. Un rapport anual mester determina e combinacion mas adecuado di barco, schedule, cantidad di pasahero, tempo riba tera, transporte y distribucion di bishitante prome cu finalisa e siguiente kalender di waf.

Pa 2031, e meta ta mantene satisfaccion di pasahero na por lo menos 95%, aumenta gasto promedio pa $250 y reduci congestion relaciona cu dianan di crucero compara cu e punto di salida di 2027. Alabes, e plan kier logra un miho conversion di pasahero di crucero pa futuro bishitante stay-over.

E limitacionnan proponi ainda no ta permanente y por ser adapta despues di evaluacion. Cu Tourism 3.0, e enfoke ta pa mantene turismo di crucero na alrededor di un miyon pasahero pa aña, mientras ta busca mas gasto pa pasahero y menos presion riba trafico, beach y facilidadnan publico.