Director di DOW, Marlon Croes a declara cu e departamento aki no ta dispone e fondo necesario pa atende cu e planta di Rioolwaterzuiverings installatie (RWZI) of di purificacion cu ta den mal estado.

E ta haya cu e infrastructura di RWZI na Bubali ta rekeri un inversion substancial. Aunke nan a yega di inverti den e planta aki pa evita cierto molester di holo den bisindario, pero e suma no tabata suficiente pa atende cu e condicion di e planta cu tin un ekipo di casi cuater decada bieu.

Un punto debil of riesgo cu nan tin cu contene ta e tanki cu ta wordo uza pa procesa e awa, ya cu e beton a cuminsa garna. E ta un asunto cu nan tin cu atende den simannan venidero pa contene e riesgo aki. Despues nan lo busca e forma huridico cu por yuda DOW busca fondo of financiamento pa bin cu inversion substancial den e planta di RWZI na Bubali. Esaki ta e forma cu nan lo por garantisa e existencia di e planta pa medio di ekipo mas moderno pa asina e stimula e actividad economico pa e planta por bira mas sostenibel.

For di aña 1992 e planta aki a cay bou maneho di DOW, despues cu WEB a wordo privatisa y bira un NV. El a bisa cu e planta di purificacion di awa sushi no ta un core business di DOW. E ta un 24/7 operation, y DOW no por atende esaki.

Na 2014 ora cu el a asumi cargo di Director, Croes a hiba un combersacion cu WEB pa nan transferi e planta aki bek pa WEB. E tempo aya nan a manda traha un rapport studio for di un compania di Hulanda pa evalua di ki manera nan por realisa e proceso di transferencia aki. Pero nunca e proyecto aki no a wordo concretisa.

E planta di Bubali ta consumi 1.2 miyon florin na coriente tur aña y e ta un suma cu, segun director di DOW, ta aumenta drasticamente nan gasto operacional. Nan a purba cu stakeholder pa yega na un forma di sociedad, pero esaki no a wordo cristalisa. Algun lunanan pasa DOW a pidi TNO pa haci un studio pa analisa e aspectonan di ganashi cu e planta aki lo por genera. Un alternativa lo ta privatisa e planta aki of explora otro forma huridico, ya sea den forma di fundacion of NV di gobierno pa e por draai di un manera responsabel. Croes a splica cu DOW ta trahando riba e alternativanan aki cu TNO a bin den su estudio cune.

Sostenibilidad

Encuanto si e planta di RWZI na Bubali por ta uno cu por genera ganashi y bira mas sostenibel, el a laga sa na Bon Dia Aruba cu e planta tin potencial latente.

E planta ta ricibi 8 mil m3 di awa pa dia. E cantidad di awa aki ta wordo purifica y manda pa Tierra del Sol y Divi Links. E otro ta wordo canalisa den Bubali Plas pa mantene su existencia. E otro resto di awa purifica ta wordo destina pa e cunukeronan y irigacion di nos zona berde pa embeyece nos isla.

E ta un forma pa baha DOW su gasto riba uzo di awa. Pero tin otro posibilidad caminda e planta aki por genera bio-gas pa produci coriente cune. Actualmente nan ta cobra 1 florin so pa entrega di 1 ton cubico di awa. Pues e gasto di produccion ta mas halto di loke ta wordo cobra.

 

LEAVE A REPLY

Please enter your comment!
Please enter your name here