Den luna di februari a tuma luga e lansamento oficial di e Plataforma Pashentnan di Aruba como un iniciativa di Fundacion SIKI. Durante e lansamento oficial aki tambe Sr. Mr.dr. Jayburtt Dijkhoff a anuncia Nurianne Arias vocero di e Plataforma Pashentnan di Aruba. Den un entrevista cu Arias el a elabora mas detayadamente tocante e vision y mision di e plataforma cu tin como enfoke duna espacio na tur pashent di Aruba pa expresa nan preocupacion y remarkenan.

BDA: Kico ta e meta di bo trabou y e plataforma?

Arias:Pashentnan di Aruba ta un plataforma unda cu tur pashent di Aruba por expresa nan preocupacion- y remarkenan pa asina contribui na un miho cuido medico. E plataforma ta logra su funcion pa medio di tres punto; 1) un vocero pa pashent; 2) un pataforma digital (grupo di Facebook: Pashentnan di Aruba) cu ya ta existente y 3) centralisa e organisacionnan di pashent.

Dia 28 di februari 2025, sr. Dijkhoff a presenta mi persona como vocero di Plataforma Pashentnan di Aruba. Den mi bida diario mi ta fungi como un docente den maneho adminstrativo na Universidad di Aruba (Facultad di Arte y Ciencia, programa Organization, Governance and Management), ta studiando pa mi phd, y mi ta un activista pa cuido di diabetes y pashentnan en general pa hopi aña.

Como vocero di e Pashentnan di Aruba, mi lo fungi como e bos di e pashentnan di Aruba den cuadro di combersacion y dialogo cu entre otro ‘Kwaliteitsraad’ di Gobierno y otro entidad di salud di Aruba. E Kwaliteitsraad ta un organo nobo den cual tur reglanan tecnico y consehonan importante tocante cuido di salud ta ser formalisa. Lo bay planea pa invita tur e organisacionnan di pashent uni un otro canal di e plataforma. Adicionalmente ta preparando pa acerca hendenan grandi cu no tin facebook pa uni via un canal alternativo. Esaki lo ser anuncia pronto.

BDA: Kico ta e motibo of di unda e idea a sali pa implementa e plataforma aki?

Arias:Aruba conoce varios organisacion cu ta trata un tipo di enfermedad of condicion, pero no tin un organisacion pa tur pashent. No ta asina leu tampoco cu por mira cu e pashentnan ta cla pa organisa nan mes via un asociacion of federacion di pashent. Pero ta importante pa pashentnan tin un organisacion cu ta representa nan of por lo menos sali na nan defensa.

Awor cu gobierno a lanta un Kwaliteitsraad cu e posibilidad cu e organisacion di pashent por tin un vos den e maneho, esaki a haci cu a lansa un plataforma pa probecha di e oportunidad aki. E plataforma ta hustamente hopi accesibel pa un y tur. E plataforma lo sigui evoluciona tambe pa keda haya informacion di esnan mas vulnerabel, manera hende grandi, personanan cu ta mas na riesgo di negligenca, etc.

BDA: Bo por conta un poco di bo mes y bo experiencia como activista?

Arias:Mi trabou como activista a cuminsa specificamente den area di diabetes. Mi a desaroya mi carera profesional door di investiga con por mehora cuido pa persona cu ta biba di diabetes. Mi motivacion a start ora cu mi mes a ser diagnostica cu diabetes tipo 1 y a ripara cu tin punto di mehoracion pa e grupo aki. Den transcurso di añanan mi a expande mi interes pa conscientisacion y investigacion di otro condicion entre otro malesa cronico y desabilidad (visibel y no visibel).

Tambe mi ta fungi como activista internacional y regional pa ‘International Diabetes Federation’ pa e ultimo cinco aña. Recientemente mi a biaha pa Bangkok, Tailandia pa presenta parti di mi investigacion cientifico y pa representa Aruba como ‘Young Leader in Diabetes’ for di e region ‘North America and Caribbean’.

BDA: Kico ta e meta y vision Fundacion SIKI?

Arias:Fundacion SIKI ta un organisacion non-profit cu ta boga pa empodera e individuo y stimula cambio social positivo. E ta haci esaki a traves di curso, investigacion y actividadnan cu ta trece cambionan constructivo den sociedad. Un tema di enfoke di e fundacion ta e derechonan di pashent. A publica un buki y a duna hopi charla gratis pa stimula esaki, pero a yega tempo pa bay pa e siguiente nivel.

Fundacion SIKI ta enfoca riba sigui fortifica e plataforma Pashentnan di Aruba y cu e meta cu esaki lo crece y organisa su mes, kisas como un asociacion independiente of otro structura solido. Na final e meta ta pa empodera e pashent/cliente y pone e cuido mas den su man y haci’e un partner digno den su propio cuido, pero tambe e cuido di salud na nos pais.