Minister Glenbert Croes a bisa cu unabes cu nan a atende cu e manifestacion di e plataforma Ta Basta, nan a dicidi di traha hunto cu nan.
E plataforma aki a lanta un fundacion y gobierno como Sociaal Crisis Plan (SCP) kier cera un acuerdo di colaboracion cu e plataforma aki. Minister Croes a bisa cu nan a tene un reunion caba cu e plataforma aki, y awe nan tin otro reunion pa asina nan por duna un man pa e SCP por bira un exito.
“Pasobra nos ta kere cu nan por aporta y yuda nos den e conscientisacion cu mester den henter comunidad,” e mandatario a bisa.
E conscientisacion aki ta necesario – segun e mandatario – na momento cu tur profesional, sector, instancia y gobierno ta trahando pa elimina tur sorto di abuso, ya cu e ta tuma un esfuerso grandi den nos comunidad. E ta haya cu lamentablemente e tipo di abuso aki mayoria di biaha ta tuma luga den seno di e propio famia y hogar. P’esey e problema aki ta demanda tur e cooperacion di nos comunidad pa atende cu e problema aki.
