Corte Supremo a sostene sentencia suspendi di seis luna den prison pa un agente di polis acusa di abusa di Mitch Henriquez resultando den su morto na 2015. E polis ta condena definitivamente pa morto di e Arubiano despues cu a usa un ‘chokehold’ riba dje durante su aresto na un festival di musica na Den Haag, NU.nl ta reporta.

Henriquez a bishita un festival di musica na Den Haag na juni 2015. Mientras e tabata burachi, el a grita na un grupo di polis cu e tabatin un arma, puntando na su parti intimo. Henriquez a ignora advertencia pa hala atras, y a keda aresta pa desorden publico. Un total di cinco polis a deten’e. A usa e chokehold riba e homber. El a bira malo y despues a fayece den hospital.

Ministerio Publico (OM) a determina cu dos agente a usa forsa desproporcional riba Henriquez. Un di nan anteriormente a ser declara inocente den corte, y OM no a apela den su caso. E polis cu a keda condena definitivamente siman pasa tabata esun cu a usa un chokehold riba Henriquez.

Mirando e riesgo asocia cu esaki, e uso di un chokehold tabata ilegal, e corte a bisa den su veredicto. Pa e motibo aki por culpa morto di Henriquez riba e agente. Corte Supremo a sostene e veredicto aki, bisando cu ‘no tabata corecto of incomprendibel’. E hecho cu e oficial no tabatin intencion di mata Henriquez no ta cambia esey, Corte Supremo a declara.

Primo di Henriquez a keda sorprendi, pero contento cu veredicto di Corte Supremo, a bisa den su prome reaccion na Omroep West. “En realidad mi a pensa cu lo declar’e inocente”, el a bisa. “Esaki ta un final bunita.”

Papiando mediante un vocero, pareha di Henriquez, Ella de Groot a bisa e noticiero cu resto di e famia tambe ta contento cu e veredicto. “Mi ta contento cu no a decepciona nos atrobe. Nos a keda decepciona tanto biaha den e proceso aki.”

E famia no ta compronde pakico no a enhuicia e agentenan pa faya di busca ayudo pa Henriquez na momento cu el a bira malo, of pakico ta permiti pa nan sigui traha cu polis. Pero nan ta spera cu nan por cuminsa procesa e morto di Mitch berdaderamente awo cu e condena ta oficial. “Unico cos ta cu nos nunca ta bay haya Mitch back.”

LEAVE A REPLY

Please enter your comment!
Please enter your name here