Recientemente Bon Dia Aruba a publica tocante e caso di un cacho cu a sali for di su cura pa stroba bisiña, ranca y ataca un chihuahua y mata esaki. Bon Dia Aruba a sigui e caso y busca informacion riba kico hende por haci ora di confronta caso similar.

Veterinario Irene Croes a menciona tocante e plan nacional cu ta birando un realidad pa por implementa. Sinembargo, e ta bisa cu en berdad tin e ley di cacho cu a introduci na 2012 y a bay na vigor na 2015, caminda tin un maneho concreto. Pero tabatin algun buraco cu mester a keda cla pa asina por cuminsa eherce e trabou di cumplimento di e ley aki.

Den caso manera cu a pasa recientemente, e ta bisa cu di berdad tin e ley caminda polis por pone e cacho drumi na e momento cu comete un acto di mata otro bestia na otro propiedad. Pero ta splica pa motibo cu e ley no tabata full concreto, hopi polis a keda demotiva y no ta tuma accion.

Tambe tabata posibel pa polis cu tabata presente na e momento ey por a duna un boet, mirando cu e cacho a sali for di su mesun cura pa causa molester y daño na un bisiña, pero ta agrega cu pa motibo di e demotivacion cu tin, kisas pa e motibo aki no a opta pa duna e doño un boet.

Croes ta bisa si cu tin un grupo di polis chikito cu si ta trahando y ta wardando pa keda cla cu e luga ‘dog shelter’, cu lo facilita cu ora mester pone un cacho drumi, tin un luga pa e bestianan aki por bay.

Segun Croes, ta trahando duro hunto cu gobernacion pa e plan nacional keda cla. Sinembargo e ta enfatisa si cu e cuido di bestia ta keda responsabilidad di doño di nan, pa tambe coopera ‘pa nan atende debidamente cu nan mascota’.

Un cacho mester ta den su cura, esey ta e ley. Segun Croes tin varios caso similar ta pasa y tin cu atende cu e problematica aki, pero pa cualkier persona cu confronta cu situacion similar por yama na 597-5369 cu por duna mas informacion pa stap cu tin cu sigui.

LEAVE A REPLY

Please enter your comment!
Please enter your name here