Ayera durante dia a circula informacion tocante un hallazgo cu a sacudi comunidad local pa e detayenan alarmante di e escena, cual polis ta investigando posiblemente como un crimen.
Den un comunicado di prensa, Cuerpo Policial a informa cu diasabra mainta a haya un curpa sin bida na un cas na Solito. Polis tecnico, Recherche y tambe dokter forensico a presenta na e sitio pa haci nan debido investigacion. Polis no a informa di e identidad ni sexo di e persona fayecido, indicando cu esaki no tabata confirma ainda. Ademas, polis a indica cu pa motibo cu e investigacion ta andando, no por a comparti mas detaye.
Sinembargo, diferente medionan local a comparti mas detaye cu ta duna gravedad na e caso.
Un di e detayenan ta cu a observa polis y brandweer a saca un freezer for di e propiedad, cu lo tabata contene algo sospechoso, cu un website indicando cu den e freezer a haya restonan humano corta na pida pida. Esaki entre otro obhetonan, incluyendo un auto, cu a confisca for di e cas na Solito.
Ta sospecha cu e curpa haya, segun rumornan den e freezer, ta pertenece na e habitante di e cas, un adulto mayor, kende ta bisa tabata desaparecido pa ultimo 10 dia. Sinembargo, vocero di polis no a confirma e detayenan aki.
Cuerpo Policial ta pidi esun cu sa algo of a wak algo yama e tiplijn di polis cu ta 11141 y nos ta garantisa cu bo ta keda ANONIMO.
