Recientemente, comunidad di Aruba a keda den shock pa e tragico accidente cu a cobra bida di un yiu di Tera, Julina de Lannoy, mientras e tabata di vakantie na Lake Como, Italia. Autoridadnan Italiano ta investigando e accidente, y evaluando si por responsabilisa un persona pa e accidente fatal.

Medionan Italiano a reporta cu Julina de Lannoy, kende tabata bishitando Italia como turista, a bira victima di un accidente di boto. Il Giorno a reporta cu e barco di huur riba cual e tabata abordo a ricibi impacto di otro barco cu tabatin un homber di 44 aña na timon – kende a bira e prome persona cu a duna asistencia tambe na momento di e accidente.

Investigacion ta andando, y a confisca ambos boto.

E accidente a cobra bida di Julina de Lannoy, kende tabatin apenas 33 aña di edad.

De Lannoy, kende a describi su mes riba rednan social como “un biahero”, tabata di vakantie cu amigonan na Lake Como. E y otro seis muhe a huur un barco cu no tabata rekeri un licencia di nabegacion. Chekeonan preliminar ta sugeri cu e otro boto, cu un homber di 44 aña na timon, a dal frontal cu e boto riba De Lannoy tabata abordo, segun Il Giorno.

Un testigo a conta cu “el a bay den e lago”, y despues di esaki, e skipper cu a causa e accidente a rescat’e y a subie riba un pontoon flotante. Den e accidente, De Lannoy a corta su pia, e tabata sangrando pisa, y tabata clinicamente morto. Wardacosta Italiano a alerta tur team di rescate disponible – terestre, marino, bombero, Cruz Cora, hidro-ambulance for di Lecco, autoridad portuario, polis financiero, polis local y polis estatal. Servicionan di emergencia a purba di stop e sangramento y haci resucitacion prome cu transporta De Lannoy na hospital Sant’Anna na San Fermo della Battaglia, unda De Lannoy a keda declara morto.

Investigacion
 Loke ta conoci actualmente tocante e investigacion ta cu unidad di polis financiero Roan a tuma test di sanger pa check nivel di alcohol den e homber di 44 aña, y a confisca ambos barco. Restonan di sanger haya den boto di De Lannoy ta sugeri cu el a sufri heridanan serio abordo prome cu el a cay den awa. Autoridadnan Italiano ta evaluando si por acusa e homber di 44 aña di homicidio imboluntario.

Lake Como
 E tragedia di De Lannoy ta marca otro accidente fatal riba Lake Como – un zona di peliger creciente unda operadornan sin experiencia ta opera motorboat y inflatables entre landadornan y botonan di tour.

Apenas un dia prome, un homber di origen Indio, di 25 aña di edad, a hoga pa alrededor di 6pm den Abbadia despues di subestima e profundidad; e homber no tabata sa con pa landa y tabata confundi pa e fondo di e lago, cu ta bira hundo rapidamente na e punto ey. Testigonan a bisa cu mientras e homber tabata hoga, “hende tabata graba cu nan celular.”